ओभर इन्भ्वाइसिङ गरी पुँजी पलायन गर्न मद्दत गर्ने बैंकलाई कारबाही गर्ने गभर्नरको चेतावनी

काठमाडौं : नेपाल राष्ट्र बैंकका गभर्नर महाप्रसाद अधिकारीले ब्याजदर एकल अंकमा ल्याउँदा पुँजी पलायन हुने जोखिमतर्फ सचेत हुनुपर्ने बताएका छन् ।

वित्तीय संस्थाका अध्यक्षहरुसँग मौद्रिक नीति र समसामयिक विषयमा भएको छलफलमा गभर्नर अधिकारीले एकल अंकको ब्याजदर भनेर मात्रै नहुने र त्यसले ल्याउन सक्ने जोखिमबारे पनि ध्यान दिनुपर्ने बताए । 

अधिकारीले बैंकिङ प्रणालीबाटै पुँजी पलायन हुने क्रम बढेको भन्दै गम्भीर चासो व्यक्त गरेका हुन् । विदेशबाट वस्तु तथा सेवाको आयात गर्दा लागतभन्दा बढी मूल्य (ओभर इन्भ्वाइसिङ) देखाएर नेपालबाट पुँजी पलायन हुने क्रम बढ्न थालेको अधिकारीले बताए ।  राष्ट्र बैंकलाई त्यस्तो सूचना प्राप्त भएको भन्दै गभर्नर अधिकारीले ओभर इन्भ्वाइसिङ गरी पुँजी पलायन गर्न मद्दत गर्ने बैंकलाई कारबाही गर्ने चेतावनी दिए ।

बैंक तथा वित्त कम्पनीका अध्यक्षहरुसँगको अन्तर्क्रियामा गभर्नरले भने,  ‘भन्सार शुल्क कम भएका वस्तुमा ओभर इन्भ्वाइसिङ गरेर बैंकिङ प्रणालीबाटै पुँजी पलायन भइरहेको छ भन्ने सूचना हामीलाई प्राप्त भएको छ, त्यसलाई गंभीररुपमा हेर्नुहोस् र रोक्नुहोस्, तपाईंहरुले रोक्नु भएन भने हामी कारबाही गर्न बाध्य हुनेछौं ।’

बैंकिङ प्रणालीबाटै पुँजी पलायन बढ्न थाल्नु खतराको संकेत भएको बताउँदै सचेत रहन गभर्नरले सुझाए । विदेशबाट सामान आयात गर्दा प्रतितपत्र (एलसी) खोल्ने क्रममा सामानको मूल्यभन्दा बढी मूल्य राखेर एलसी खोलिएको भेटिएपछि राष्ट्र बैंक कडाइ गर्ने अवस्थामा पुगेको सन्देश गभर्नर अधिकारीले अध्यक्षहरुलाई बोलाएर दिएका हुन् ।

पहिलो चरणमा राष्ट्रबैंकले सचेत गराउन छलफल गराएको र उक्त क्रम नरोकिएन बैंक र व्यवसायी दुबैलाई कानुनी दायरामा ल्याउने तर्फ राष्ट्रबैंकको तयारी रहेको जनाइएको छ ।