आन्तरिक राजस्व विभागले उठायो दुई खर्ब ७९ अर्ब राजस्व, लक्ष्यभन्दा २० प्रतिशत कम 

काठमाडौं : आन्तरिक राजस्व विभागले चालु आर्थिक वर्षको सात महिना अर्था माघ मसान्तसम्म लक्ष्यको ८०.३० प्रतिशत राजस्व संकलन गरेको छ । विभागले यस अवधिमा २ खर्ब ७९ अर्ब ४९ लाख रुपैयाँ राजस्व संकलन गरेको हो । 

माघ मसान्तसम्म विभागले ३ खर्ब ४७ अर्ब ४३ करोड ५९ लाख रुपैयाँ राजस्व संकलन गर्ने लक्ष्य लिएको थियो । यस अवधिमा आयकरबाट एक खर्ब ४२ अर्ब १९ करोड ५३ लाख रुपैयाँ राजस्व उठाउने लक्ष्य लिएकोमा एक खर्ब २६ अर्ब ९८ करोड ४८ लाख रुपैयाँ उठाएको छ । जुन लक्ष्यको ८९.३० प्रतिशत हो । 

माघ मसान्तसम्म विभागले घरबहाल करबाट लक्ष्यको ६८.९३ प्रतिशत राजस्व संकलन गरेको छ । उक्त शीर्षकबाट एक अर्ब ९९ करोड ८ लाख रुपैयाँ राजस्व उठाउने लक्ष्य लिएको विभागले एक अर्ब ३७ करोड २३ लाख रुपैयाँ उठाएको हो । 

त्यसैगरी, विभागले ब्याजबाट माघ मसान्तसम्म २५ अर्ब ७३ करोड ३८ लाख रुपैयाँ राजस्व उठाएको छ । यस अवधिमा ३४ अर्ब १८ करोड ७० लाख रुपैयाँ राजस्व उठाउने लक्ष्य लिएको थियो । लक्ष्यको ७५.२७ प्रतिशतमा मात्रै उठाउन सफल भएको छ । 

विभागका अनुसार भ्याटबाट यस अवधिमा लक्ष्यको ७८.६६ प्रतिशत राजस्व संकलन भएको छ । भ्याटबाट ८३ अर्ब १२ करोड ८४ लाख रुपैयाँ राजस्व उठाउने लक्ष्य लिएको विभागले ६५ अर्ब ३८ करोड ९६ लाख रुपैयाँ राजस्व उठाएको हो । 

चालु आवको माघ मसान्तसम्म अन्तशुल्क शीर्षकमा ५३ अर्ब ७९ करोड ८२ लाख रुपैयाँ राजस्व संकलन भएको छ । जुन लक्ष्यको ६८.६८ प्रतिशत हो । विभागले उक्त शीर्षकमा ७८ अर्ब ३२ करोड ९५ लाख रुपैयाँ राजस्व उठाउन लक्ष्य लिएको थियो । 
त्यस्तै यस अवधिमा स्वास्थ्य शीर्षकमा विभागले लक्ष्यको ६२.९८ प्रतिशत राजस्व संकलन गरेको छ । स्वास्थ्य शीर्षकमा६ अर्ब १० करोड ४८ लाख रुपैयाँको लक्ष्य लिएको विभागले ३ अर्ब ८४ करोड ५० लाख रुपैयाँ उठाएको हो ।

यस अवधिमा विभागले शिक्षा शीर्षकमा राजस्वको लक्ष्य भेटेको छ । माघ मसान्तसम्म शिक्षा शीर्षकमा एक अर्ब ५० करोड रुपैयाँ राजूव उठाउने लक्ष्य लिएको विभागले एक अर्ब ८८ करोड १० लाख रुपैयाँ उठाएको हो । जुन लक्ष्यको १२५.४० प्रतिशत हो । 

माघमा ब्याज र शिक्षाबाट उठ्ने राजस्वको लक्ष्य पुरा 

चालु आवको माघ महिनामा विभागले ब्याज र शिक्षा शीर्षकको राजस्वको लक्ष्य पुरा गरेको छ । माघमा विभागले ४३ अर्ब एक करोड ५ लाख रुपैयाँ राजस्वको लक्ष्य लिएको विभागले ३६ अर्ब ३६ करोड ९६ लाख रुपैयाँ उठाएको हो । जुन लक्ष्यको ८४.५६ प्रतिशत हो । 

यस अवधिमा विभागले ब्याजबाट ६ अर्ब ५९ करोड १७ लाखको लक्ष्य लिएकोमा ६ अर्ब ८४ करोड ५छ लाख रुपैयाँ राजस्व उठाएको छ । जुन लक्ष्यको १०३.७० प्रतिशत हो । 

त्यसैगरी यस अवधिमा शिक्षा शीर्षकमा लक्ष्यको १६३.४७ प्रतिशत राजस्व संकलन भएको विभागले जनाएको छ । माघमा शिक्षाबाट १७ करोड ९५ लाख रुपैयाँ उठाउने लक्ष्य लिएको विभागले २९ करोड ३४ लाख रुपैयाँ उठाउन सफल भएको हो । 

त्यसैगरी यस अवधिमा विभागले आयकरबाट लक्ष्यको ८२.२१ प्रतिशत, घरबहाल करबाट लक्ष्यको ७५.८८ प्रतिशत भ्याटबाट ८६.९५ प्रतिशत, अन्तशुल्कबाट लक्ष्यको ७२.३१ प्रतिशत र स्वास्थ्य शीर्षकबाट लक्ष्यको ६२.६० प्रतिशत राजस्व संकलन गरेको छ ।

सात महिनामा उठ्यो साढे ५ खर्ब राजस्व

सरकारले चालु आर्थिक वर्षको सात महिनामा ५ खर्ब ६७ अर्ब रुपैयाँ राजस्व संकलन गरेको छ । अर्थमन्त्रालयका अनुसार यस अवधिमा लक्ष्य भन्दा २६ प्रतिशत कम राजस्व संकलन भएको हो । सरकारले चालु आवको माघ मसान्तसम्म ७ खर्ब ६७ अर्ब रुपैयाँ राजस्व संकलन गर्ने लक्ष्य लिएको थियो । 

तर, गत वर्षको सोही अवधिको तुलनामा १०.२४ प्रतिशत बढी राजस्व संकलन भएको अर्थ मन्त्रालयले जनाएको छ । सरकारले गत वर्षको माघ मसान्तसम्म ५ खर्ब १५ अर्ब रुपैयाँ राजस्व संकलन गरेको थियो ।

भन्सार विभागले माघ मसान्तसम्म ३ खर्ब ५७ अर्ब रुपैयाँ राजस्व उठाउने लक्ष्य लिएकोमा २ खर्ब ३० अर्ब रुपैयाँ संकलन गरेको छ । विभागले गत वर्षको तुलनामा ९.९१ प्रतिशत बढी राजस्व संकलन गरेको हो । 

सरकारले चालु आर्थिक वर्षमा १४ खर्ब २२ अर्ब रुपैयाँ राजस्व उठाउने लक्ष्य निर्धारण गरेको थियो । तर, लक्ष्य अनुसार राजस्व संकलन नहुँदा सरकारले यो वर्ष १२ खर्ब २ अर्ब रुपैयाँ मात्रै राजस्व संकलन गर्ने लक्ष्य राखेको छ ।