नेपाल रिपब्लिक मिडिया नोक्सानीमा, प्रतिशेयर आम्दानी पनि ऋणात्मक 

काठमाडौं : नेपाल रिपब्लिक मिडियाले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण प्रकाशित गरेको छ। उक्त विवरण अनुसार कम्पनीले यस अवधिमा ५२ लाख २६ हजार रुपैयाँ नोक्सानी व्यहोरेको छ । गत आवको सोही अवधिसम्ममा ३ करोड ९३ लाख रुपैयाँ खुद नाफा आर्जन कमाएको कम्पनीले यस वर्ष नोक्सानी व्यहोरेको हो । 

समिक्षा अवधिमा आम्दानी घटेपछि कम्पनीले नोक्सानी व्यहोर्नु परेको हो। गत वर्ष १५ करोड ९१ लाख रुपैयाँ आम्दानी गरेको कम्पनीले यस अवधिमा १३ करोड ५७ लाख रुपैयाँ आम्दानी गरेको छ । जुन १४.७३ प्रतिशतले कम हो । कम्पनीको कुल नाफा १७.१२ प्रतिशत घटेको छ भने सञ्चालन मुनाफा ६४.७७ प्रतिशत घटेको छ।

चैत मसान्तसम्ममा कम्पनीको प्रतिशेयर आम्दानी ७२ पैसा ऋणात्मक रहेको छ भने प्रतिशेयर नेटवर्थ ८७ रुपैयाँ ८१ पैसा रहेको छ। तेस्रो त्रैमासम्म ९६ करोड ७५ लाख रुपैयाँ चुक्ता पूँजी रहेको यस कम्पनीको सञ्चित नोक्सानी ५१ करोड ५० लाख रुपैयाँ रहेको छ।