पन्ध्र दिनभित्र कोपोमिसमा आवद्ध हुन २६ सहकारीलाई विभागको निर्देशन, अन्यथा संस्था खारेज गरिने 

काठमाडौं : सहकारी विभागले २६ सहकारीलाई १५ दिन भित्र कोपोमिस प्रणालीमा आवद्ध हुने निर्देशन दिएको छ । विभागले बिहिबार एक सूचना जारी गर्दै विभागको नियमन क्षेत्राधिकारभित्र पर्ने उक्त सहकारीलाई कोपोमिसमा आवद्ध हुन भनेको हो । 

सहकारी ऐन, २०७४ अनुसार सबै सहकारी संघसंस्थाहरुले विभागले तोकेको एकिकृत व्यवस्थापन सूचना प्रणाली कोपोमिसमा अनिवार्य रुपमा आवद्द भई विवरण प्रविष्ट गर्नुपर्ने उल्लेख छ । सरकारको आर्थिक वर्ष २०८१÷८२ को नीति तथा कार्यक्रममा समेत महत्वका साथ उल्लेख भएको छ । 

यस विभागबाट पटक पटक निर्देशन हुँदा समेत विभागको नियमन क्षेत्राधिकारभित्र पर्ने तपसिलका संस्थाहरुले हालसम्म पनि उक्त प्रणालीमा आवद्द भई विवरण प्रविष्ट नगरेको विभगाले जनाएको छ ।

तोकिएको समयमा विवरण नगरेमा सहकारी ऐन, २०७४ को दफा ८८ बमोजिम संस्था खारेजीसम्मको कारवाही प्रक्रिया अगाडी बढाईने विभागले चेतावनी दिएको छ ।