राष्ट्र बैंकको लचक नीतिले झण्डै १३ प्रतिशतले बढ्यो शेयर धितो कर्जा, नबिल दियो सर्वाधिक

काठमाडौं : पछिल्लो समय बैंक तथा वित्तीय संस्थाहरुको मार्जिन प्रकृतिको कर्जा प्रवाह बढेको छ । मौद्रिक नीति मार्फत राष्ट्र बैंकले लचिलो नीति लिएसँगै बैंक तथा व्त्तिीय संस्थाहरुबाट प्रवाह हुने शेयर धितो कर्जा पनि बढ्न थालेको हो । 

राष्ट्र बैंकले चालु आर्थिक वर्षको मौद्रिक नीतिको प्रथम त्रैमासिक समीक्षामार्फत शेयर धितो कर्जाको जोखिम भार घटाएको थियो । हाल ५० लाख रुपैयाँभन्दा माथिको शेयर धितो कर्जामा १२५ प्रतिशत जोखिम भार कायम गरिएको छ । यसअघि ५० लाख रुपैयाँभन्दा माथिको कर्जामा १५० जोखिम भार कायम गरिएको थियो ।

त्यस्तै राष्ट्र बैंकले १२ करोडको शेयर धितो कर्जा क्याप सीमालाई परिमार्जन गरेर व्यक्तिगततर्फ १५ करोड र संस्थागततर्फ २० करोडसम्म कर्जा लिन पाउने व्यवस्था गरेको थियो । जसले गर्दा शेयर धितो कर्जा बढ्न पुगेको हो ।

नौ महिनामा ८६ अर्ब १८ करोड लगानी 

राष्ट्र बैंकका अनुसार चालु आवको चैत मसान्तसम्म शेयर धितो कर्जामा बैंक तथा वित्तीय संस्थाहरुले ८६ अर्ब १८ करोड रुपैयाँ लगानी गरेका छन् । जुन गत असार मसान्तको तुलनामा १२.९ प्रतिशतले बढी हो । असार मसान्तसम्म यस्तो कर्जा ७६ अर्ब ३० करोड रुपैयाँ प्रवाह भएको थियो । 

यस अवधिमा वाणिज्य बैंकहरुले ६७ अर्ब ५२ करोड ५ लाख, विकास बैंकहरुले १४ अर्ब ९४ करोड ८ लाखर फाइनानस कम्पनीहरुले ३ अर्ब ७१ करोड रुपैयाँ शेयर धितो कर्जामा लगानी गरेका छन् ।

तर गत आवको सोही अवधिको तुलनामा भने यस्तो कर्जा घटेको छ । राष्ट्र बैंकको तथ्यांक अनुसार गत आवको चैत मसान्तसम्म बैंक तथा वित्तीय संस्थाहरुले शेयर धितो कर्जामा ९४ अर्ब ५९ करोड रुपैयाँ लगानी गरेका थिए ।

चैत मसान्तसम्म शेयर धितो कर्जामा १ करोडमाथिको कर्जा ५२ अर्ब ६१ करोड प्रवाह भएको छ भने ५० लाखदेखि १ करोडसम्मको १२ अर्ब प्रवाह भएको छ । त्यस्तै २५ लाखदेखि ५० लाखसम्म १४ अर्ब १८ करोड र २५ लाखभन्दा मुनिको ७ अर्ब ३७ करोड प्रवाह भएको छ ।

कुन बैंकले कति गरे लगानी ? 

चैत मसान्तसम्म वाणिज्य बैंकरुले शेयर धितो कर्जामा ६७ अर्ब ५२ करोड ५ लाख रुपैयाँ लगानी गरेका छन् । जसमा सर्वाधिक लगानी नबिल बैंकको रहेको छ । नबिलले यस अवधिमा ११ अर्ब ६१ करोड ३६ लाख रुपैयाँ शेयर धितो कर्जामा लगानी गरेको छ । 

त्यस्तै चैत मसान्तसम्म नेपाल बैंकले ५ अर्ब ४४ करोड ७० लाख रुपैयाँ, राष्ट्रिय वाणिज्य बैंकले ४ अर्ब १६ करोड ४९ लाख, नेपाल इन्भेष्टमेन्ट मेगाले २ अर्ब ३ करोड ३२ लाख रुपैयाँ शेयर धितोमा लगानी गर्दा स्ट्याण्डर्ड चार्टर्ड बैंकको लगानी भने शुन्य रहेको छ । 

राष्ट्र बैंकका अनुसार यस अवधिमा हिमालयन बैंकले शेयर मार्जिन कर्जामा २ अर्ब १३ करोड १८ लाख, नेपाल एसबिआईले १२ करोड ५७ लाख, एभरेष्टले २ अर्ब ४ करोड ९१ लाख, एनआईसी एशियाले ४ अर्ब १७ करोड २२ लाख, माछापुच्छ्रे बैंकले ४९ करोड ७५ लाख रुपैयाँ लगानी गरेको राष्ट्र बैंकको तथ्यांकमा उल्लेख छ । 

त्यस्तै चालु आवको नौं महिनामा कुमारी बैंकले शेयर धितो कर्जामा ४ अर्ब १ करोड ७० लाख रुपैयाँ लगानी गरेको छ भने सिद्धार्थ बैंकले ५ अर्ब ४९ करोड ९६ लाख, कृषि विकास बैंकले एक अर्ब २८ करोड ३९ लाख र ग्लोबल आईएमईले बंकले ६ अर्ब ९२ करोड ८१ लाख रुपैयाँ कर्जा प्रवाह गरेको छ । 

राष्ट्र बैंकका अनुसार चैत मसान्तसम्म सिटिजन बैंकले ४ अर्ब ४३ करोड ३४ लाख, प्राइम कमर्सियलले ४ अर्ब १४ करोड ४८ लाख, एनएमबीले ८९ करोड ९१ लाख, प्रभु बैंकले ३ अर्ब २१ करोड ५२ लाख, लक्ष्मी सनराइज बैंकले ३ अर्ब २४ करोड ३६ लाख   र सानिमा बैंकले एक अर्ब ६२ करोड ४३ लाख रुपैयाँ शेयर धितो कर्जा दिएका छन् ।