आर्थिक शिथिलताका बाबजुद बीमा कम्पनीकाे व्यापारमा सुधार, एक वर्षमा करिब १५ अर्बले बढ्याे व्यवसाय 

काठमाडौं : आर्थिक मन्दीका बाबजुद पनि बीमा कम्पनीहरुको व्यापारमा सुधार देखिएको छ । अर्थतन्त्रमा देखिएको संकटले समग्र क्षेत्र प्रताडित बनेको बेला बीमा कम्पनीहरुले भने व्यवसायलाई भने बढाइरहेका छन् ।

एक वर्षको अवधिमा बीमा कम्पनीहरुको व्यापार करिब १५ अर्ब रुपैयाँले बढेको छ । गत आर्थिक वर्षमा बीमा कम्पनीहरुले एक खर्ब ९७ अर्ब ४८ करोड ५२ लाख रुपैयाँ बराबरको व्यवसाय गरेका छन् । 

नेपाल बीमा प्राधिकरणका अनुसार उक्त रकम अघिल्लो आव २०७९/८० सोही अवधिको तुलानामा ८.१७ प्रतिशत अर्थात १४ अर्ब ९१ करोड ७५ लाख रुपैयाँले बढी हो । अघिल्लो वर्ष बीमा कम्पनीहरुले एक खर्ब ८२ अर्ब ५६ करोड ७७ लाख रुपैयाँ बराबरको व्यवसाय गरेका थिए ।

आव २०८०/८१ मा जीवन बीमा कम्पनीहरुले डेढ खर्बको व्यापार गरेका छन् । यस अवधिमा कम्पनीहरुले एक खर्ब ५६ अर्ब ३१ करोड ७९ लाख रुपैयाँ बराबरको व्यवसाय गरेका छन् । त्यस्तै निर्जीवन बीमा कम्पनीहरुले ४१ अर्ब १६ करोड  ७३ लाख रुपैयाँ बराबरको व्यापार गरेका छन् ।

अघिल्लो आवको सोही अवधिको तुलनामा जीवन बीमा कम्पनीको व्यापार ९.८० प्रतिशत अर्थात १३ अर्ब ९६ करोड १९ लाख रुपैयाँले बढेको छ भने निर्जीवन बीमा कम्पनीहरुको व्यवसाय २.७३ प्रतिशत अर्थात ९५ करोड ५२ लाख बढेको छ ।

जीवन बीमा तर्फ

गत आवमा राष्ट्रिय जीवन बीमा कम्पनीले ८ अर्ब ७१ करोड ४९ लाख रुपैयाँ बराबरको व्यापार गरेको छ भने नेशनल लाइफले १९ अर्ब २० करोड २८ लाख रुपैयाँ बीमाशुल्क आर्जन गरेको छ ।

प्राधिकरणका अनुसार यस अवधिमा नेपाल लाइफ इन्स्योरेन्सले ४० अर्ब ८५ करोड ३४ लाख, लाइफ इन्स्योरेन्स कर्पोरेशनले १८ अर्ब ९ करोड ९७ लाख, मेट लाइफले ५ अर्ब ६७ करोड ८९ लाख, एशियन लाइफले ८ अर्ब ५ करोड १५ लाख र आईएमइई लाइफ इन्स्योरेन्सले ४ अर्ब ७४ करोड १३ लाख रुपैयाँ बराबरको व्यवसाय गरेको छ ।

त्यसैगरी असार मसान्तसम्म सन नेपाल लाइफले ३ अर्ब ८८ करोड ५४ लाख, रिलायबल नेपाल लाइफले ४ अर्ब २० करोड ८२ लाख, सिटिजन लाइफले ६ अर्ब २१ करोड ५३ लाख र सूर्यज्योति लाइफ इन्स्योरेन्सले ९ अर्ब ४९ करोड ७८ लाख रुपैयाँ बराबरको बीमाशुल्क आर्जन गरेको प्राधिकरणको तथ्यांकमा उल्लेख छ । 

गत आवमा सानिमा रिलायन्स लाइफले ६ अर्ब १८ करोड ८३ लाख, हिमालयन लाइफले १६ अर्ब ६० करोड ८० लाख रुपैयाँ र प्रभु महालक्ष्मी लाइफ इन्स्योेरेन्सले ३ अर्ब ३७ करोड २४ लाख रुपैयाँ बराबरको व्यवसाय गरेको छ ।

निर्जीवन बीमातर्फ

यता निर्जीवन बीमातर्फ गत आवमा नेपाल इन्स्योरेन्सले एक अर्ब ५९ करोड ४ लाख रुपैयाँ बराबरको व्यापार गरेको छ भने दि ओरियन्टलले दुई अर्ब १६ करोड १५ लाख रुपैयाँ बराबरको बीमाशुल्क संकलन गरेको छ । 

त्यसैगरी असार मसान्तसम्म राष्ट्रिय बीमा कम्पनीले एक अर्ब ५८ करोड ९९ लाख, नेशनल इन्स्योरेन्सले एक अर्ब १९ करोड ८७ लाख, नेको इन्स्योरेन्सले ३ अर्ब १४ करोड ११ लाख, प्रभु इन्स्योरेन्सले एक अर्ब ७७ करोड ७९ लाख र शिखर इन्स्योरेन्सले सबैभन्दा बढी ५ अर्ब ४७ करोड तीन लाख रुपैयाँ बराबरको व्यापार गरेको छ । 

त्यसैगरी यस अवधिमा एनएलजी इन्स्योरेन्सले दुई अर्ब ५५ करोड २८ लाख, हिमालयन एभरेष्टले तीन अर्ब ७२ करोड २९ लाख, सानिमा जिआईसीले दुई अर्ब ६१ करोड ८५ लाख रुपैयाँ र सिद्धार्थ प्रिमियरले ४ अर्ब १७ करोड ७२ लाख रुपैयाँ बराबरको बीमाशुल्क आर्जन गरेको प्राधिकरणको तथ्यांकमा उल्लेख छ । 

प्राधिकरणका अनुसार एक वर्षमा सगरमाथा लुम्बिनी इन्स्योरेन्सले ४ अर्ब ७८ करोड ७२ लाख, आईजीआई प्रुडेन्सियलले ३ अर्ब ६५ करोड ६ लाख र युनाइटेड अजोड इन्स्योरेन्सले २ अर्ब ७२ करोड ७३ लाख रुपैयाँ बराबरको व्यवसाय गरेका छन् ।