सदस्यलाई सुखी बनाउँदै दिगो सहकारी बन्ने पोखरा रोयलको प्रण 

काठमाडौं : पोखराको बुद्ध चोकमा मुख्य कार्यालय रहेको पोखरा रोयल बचत तथा ऋण सहकारी संस्था आज (बिहीवार)बाट २४ औं वर्षमा प्रवेश गरेको छ ।

‘सुखी सदस्य, दिगो सहकारी’को परिकल्पनाका साथ सदस्य सेवामा समर्पित पोखरा रोयल सदस्यमैत्री, प्रविधिमैत्री, विश्वसनीय, सुरक्षित अनि पारदर्शी सेवालाई जोड दिएको छ ।स्थापना दिवसको अवसरमा अध्यक्ष रुद्र कुमारी गुरुङ (मैना) र प्रमुख कार्यकारी अधिकृत भीम बहादुर गुरुङले संयुक्त रुपमा शुभकामनामार्फत सदस्यलाई सुखी बनाउँदै दिगो सहकारी बन्ने पोखरा रोयलको प्रण गरेका छन् ।

यस्तो छ वित्तीय अवस्था
२०८२ बैशाख मसान्तको वित्तीय विवरणअनुसार हाल संस्थामा १० हजार २ सय १८ जना सदस्य छन् । संस्थाको कुल सम्पत्ति २ अर्ब ५८ करोड बढी छ । १५ करोड ३० लाख बढी शेयर पुँजी रहेको साकोससँग २१ करोड ३० लाख बढी स्वपुँजी अर्थात् संस्थागत पुँजी छ । 

२ अर्ब ५९ लाख बढी बचत रहेको साकोसले १ अर्ब ६८ करोड बढी ऋण लगानी गरेको छ । तरलता ३८.७२ प्रतिशत छ । 

युवा सहभागितामा जोड
पोखरा रोयलले युवा सहभागितामा विशेष जोड दिदै आएको छ । संस्थामा आवद्ध कुल सदस्यहरु मध्ये १६ देखि ४० वर्ष उमेर समूहका ३९७८ जना अर्थात् ४२.६९ प्रतिशत रहेका छन् र त्यस्तै ४१ देखि ६० वर्ष उमेर समूहका ४१३२ अर्थात् ४४.३४ प्रतिशत, ६१ देखि ७५ वर्ष उमेर समुहका सदस्यहरु १०७५ अर्थात् ११.५४ प्रतिशत र ७५ वर्ष भन्दा माथिका १३३ जना अर्थात् १.४३ प्रतिशत सदस्यहरु रहेका छन् ।

सदस्य सेवामा विविधता 
संस्थाले वित्तीय कारोबारसँगै सदस्य सेवा र सामुदायिक सेवामा आफूलाई अब्बल सावित गरेको छ । सदस्यहरूलाई सहुलियत प्रदान गर्ने उद्देश्यले विभिन्न संस्थाहरूसँग सम्झौता गरी सेवा प्रदान गर्दै आइरहेको छ । बुद्धचोकमै ग्यालेक्सी हस्पिटल, रोयल दिदिबहिनी किचन, आविष्कार हस्पिटल अर्थोप्लास्टी एन्ड ट्रमा सेन्टर, न्यूरोडमा युनाइटेड रिफरेन्स ल्याबोरेटरी, लाइफकेयर डाइग्नोस्टिक्स, पद्मश्री हस्पिटल एन्ड एप्लाइड साइन्सेस सेवा दिइरहेको छ । यी संस्थाहरूबाट सेवा लिँदा सहकारीका सदस्यहरूले सहुलियतसमेत पाउँछन् । यसले गर्दा सदस्यहरुलाई सहकारीमार्फत विविध लाभ उपलब्ध भइरहने र संस्थाप्रति समर्पण भाव पैदा गर्ने विश्वास साकोसले लिएको छ ।

सदस्यलाई पेन्सनदेखि राहतसम्म
संस्थाले हरेक वर्ष ७५ वर्ष उमेर पुगेका ज्येष्ठ सदस्यहरुलाई वार्षिक रुपमा पेन्सन प्रदान गर्दै आएको छ । गत आर्थिक वर्षमा ४२ जना सदस्यलाई ५ हजारका दरले पेन्सन प्रदान गरिएको थियो । संस्थाले रोयल फाउण्डेसनमार्फत सदस्यलाई यस्तो सेवा प्रदान गर्दै आएको छ । रोयल फाउण्डेसन संस्थामा आवद्ध सदस्यहरु सम्मिलित सामाजिक संस्था हो ।

साथै फाउण्डेसनले संस्थासँग समन्वय गर्दै सुत्केरी स्याहार खर्च, दैवी प्रकोप राहत, स्वास्थ्य उपचार खर्च, पेन्सन सुविधा र सदस्यहरुको मुत्यु भएका अवस्थामा निजका परिवारलाई मृत्यु राहत समेत प्रदान गर्दै आईरहेको छ । संस्थाले विगत ७ वर्षदेखि नियमित रुपमा राहत तथा सहयोगको कार्यक्रम सञ्चालन गर्दै आएको सहकारीका सूचना अधिकारी मीलन ढकालले बताए ।

प्रविधीमैत्री सेवा
संस्थाले प्रविधिमैत्री सेवालाई विशेष जोड दिएको । मोबाईल बैंकिङ तथा भुक्तानी प्लेटफर्म कम्पनी एम बैंक टेक्नोलोजीसँग सहकार्य गरे प्रवित्रिमैत्री सेवा प्रवाह गरिरहेको छ । 
संस्थाले सेवालाई क्रमशः क्यासलेस, चेकलेस र पेपरलेस बनाउने अभियान थालेको छ । 

हालसम्म दुई हजार सदस्यले एटिएम सेवा, १६९८ जनाले मोवाईल बैंकिङ्ग, ३३३ जनाले एस.एम.एस.सेवा र १५१ जनाले क्यू आर कोड प्रविधिको प्रयोग गरिरहेका छन् । त्यस्तै १२६० जना सदस्यले स्मार्ट परिचय पत्र ग्रहण गरिसकेको छ । संस्थाको वेबसाईट, फेसबुक अकाउण्ट, यूटयूब च्यानल, टिकटक र इन्स्टाग्रामलाई समय सापेक्ष परिमार्जन गर्दै सदस्य सेवा, वस्तुहरुको प्रचार प्रसार र सहज रुपमा सूचना दिने माध्यमको रुपमा विकास गरिरहेको छ ।

संस्थाको कारोबारलाई थप सुव्यवस्थित र समयानुकुल बनाउन कोर बैंकिङ्ग प्रविधीलाई अवलम्बन गरेको छ । तथ्याङ्कहरुलाई क्लाउड प्रविधिमार्फत सुरक्षित गरिएको छ । संस्थाको तालिम हलमा स्मार्ट बोर्डमार्फत तालिम तथा प्रशिक्षणको व्यवस्था गरिएको छ भने कनेक्ट आईपिएस, ट्याबलेट बैंकिङ्गको सुविधा समेत प्रदान गरेको छ ।

यसरी जन्मियो पोखरा रोयल
२०५५ सालमा काठमाडौंको बसुन्धरामा रहेको रोयल बहुउद्देश्यीय सहकारी स्थापना भएको थियो । सोही संस्थाको उपाध्यक्ष भीम बहादुर गुरुङ थिए । गुरुङले २०५५ मा दुलेगौडा र २०५६ देखि २०५८ पोखरा कार्यालय सञ्चालनको भूमिकामा रही काम गरेका थिए ।

तत्कालिन सहकारी ऐनमा भएको संशोधनले सहकारीका शाखा कार्यालय नरहने व्यवस्था अनुरुप पोखरा कार्याललाई स्वायत्त गर्ने निर्णय भयो । २०५९ साल जेठ ८ गते २८ जना व्यक्तिहरु मिलेर ‘पोखरा रोयल बचत तथा ऋण सहकारी संस्था लि.’ दर्ता भयो । संस्था दर्ता बखत गुरुङ सचिव एवं प्रबन्ध निर्देशक थिए । सहकारी ऐन २०७४ ले २ करोडभन्दा माथिको संस्थाका कार्यकारी सञ्चालक हुन नपाउने व्यवस्थासँगै २०७६ सालबाट गुरुङ प्रमुख कार्यकारी अधिकृतको भूमिकामा मात्रै छन् ।