तीन महिनामा भित्रिए दुई हजार ६२० युनिट इभी गाडी, करिब चार अर्ब उठ्यो राजस्व 

काठमाडौं : चालु आर्थिक वर्षको तीन महिनामा दुई हजार ६२० युनिट विद्युतीय कार, जीप र भ्यान आयात भएको छ । यस अवधिमा सरकारले छ अर्ब २५ करोड ५ लाख ५८ हजार रुपैयाँ उक्त संख्यामा गाडी आयात गरेको हो ।

भन्सार विभाग तथ्यांकअनुसार विद्युतीय गाडीको आयातबाट तीन अर्ब ९१ करोड ६५ लाख ८२ हजार रुपैयाँ राजस्व संकलन भएको छ । नेपालमा विश्वप्रसिद्ध ब्रान्डका ५० किलोवाटदेखि ३०० किलोवाटका विद्युतीय गाडी आयात हुने गरेका छन् । 

यस अवधिमा सबैभन्दा धेरै ५१ देखि १०० किलोवाटका गाडी आयात भएका छन् । यस सेग्मेन्टमा तीन अर्ब ५१ करोड ४१ लाख मूल्यका एक हजार ५४५ युनिट गाडी भित्रिएका छन् ।

सबैभन्दा धेरै विद्युतीय गाडी छिमेकी मुलुक चिनबाट आउने गरेको छ भने भारत, कोरिया, जर्मन, इन्डोनेसिया, अमेरिका लगायतका मुलुकहरूबाट पनि नेपालमा विद्युतीय सवारी आयात हुने गरेको छ ।

असोज मसान्तसम्म नेपालले ५० किलोवाटसम्मका एक अर्ब २६ करोड ६७ लाख मूल्य बराबरका ७५१ युनिट गाडी आयात गरेको छ । त्यस्तै १०१ देखि २०० किलोवाटसम्मका १८ करोड ९३ लाख रुपैयाँ बराबरको ३२३ युनिट गाडी आयात भएका छन् । 

विभागका अनुसार यस अवधिमा २०१ देखि ३०० किलोवाटसम्मका ४८ करोड ४९ लाख रुपैयाँ बराबरका एक युनिट गाडी आयात भएका छन् ।