घट्यो इभी आयातको ग्राफः पाँच महिनामा ३८ सय युनिट भित्रिँदा, राजस्वमा २० प्रतिशतको गिरावट

काठमाडौं : नेपालमा विद्युतीय सवारी साधन (इभी) गाडीको प्रयोग बढेपनि गत वर्षको तुलनामा आयातको तथ्यांक भने खुम्चिएको छ । चालु आर्थिक वर्षको पाँच महिनामा तीन हजार ७९८ युनिट विद्युतीय कार, जीप र भ्यान आयात भएका छन् ।

यस अवधिमा सरकारले आठ अर्ब ९५ करोड ५१ लाख ४० हजार रुपैयाँ उक्त संख्यामा गाडी आयात गरेको हो । भन्सार विभागको तथ्यांकअनुसार विद्युतीय गाडीको आयातबाट पाँच अर्ब ५६ करोड ३३ लाख ३३ हजार रुपैयाँ राजस्व संकलन भएको छ । 

उक्त राजस्व गत आवको सोही अवधिको तुलनामा २० प्रतिशतले कम हो । गत वर्ष सरकारले ११ अर्ब २७ करोड २१ लाख रुपैयाँ बराबरको चार हजार ६९७ युनिट इभी गाडी आयात गर्दा छ अर्ब ९६ करोड २८ लाख रुपैयाँ बराबरको राजस्व उठाएको छ । 

नेपालमा विश्वप्रसिद्ध ब्रान्डका ५० किलोवाटदेखि ३०० किलोवाटका विद्युतीय गाडी आयात हुने गरेका छन् । नेपाली बजारमा विशेष गरी मध्यम क्षमताका विद्युतीय गाडीको माग उच्च देखिएको छ ।

तथ्यांक अनुसार यस अवधिमा सबैभन्दा धेरै ५१ देखि १०० किलोवाटका गाडी आयात भएका छन् । यस सेग्मेन्टमा पाँच अर्ब ६० करोड ८६ लाख मूल्यका दुई हजार १६४ युनिट गाडी भित्रिएका छन् ।

सबैभन्दा धेरै विद्युतीय गाडी छिमेकी मुलुक चिनबाट आउने गरेको छ भने भारत, कोरिया, जर्मन, इन्डोनेसिया, अमेरिका लगायतका मुलुकहरूबाट पनि नेपालमा विद्युतीय सवारी आयात हुने गरेको छ ।

मंसिर मसान्तसम्म नेपालले ५० किलोवाटसम्मका दुई अर्ब सात करोड ३२ लाख मूल्य बराबरका एक हजार २१५ युनिट गाडी आयात गरेको छ । त्यस्तै १०१ देखि २०० किलोवाटसम्मका एक अर्ब २३ करोड ८१ लाख रुपैयाँ बराबरको ४१४ युनिट गाडी आयात भएका छन् । 

विभागका अनुसार यस अवधिमा २०१ देखि ३०० किलोवाटसम्मका तीन करोड ५१ लाख ३३ हजार रुपैयाँ बराबरका पाँच युनिट गाडी आयात भएका छन् ।