१३ खर्बको वैदेशिक व्यापारमा साढे नौ खर्ब घाटा, निर्यातमा बढेपनि अर्थतन्त्र अझै दबाबमा

काठमाडौं : चालु आर्थिक वर्षको सात महिनामा नेपालको वैदेशिक व्यापारको आकार बढेपनि व्यापार घाटाको झन् गहिरिएको छ । 

Sponsored Advertisement

भन्सार विभागको तथ्यांक अनुसार यस अवधिमा करिब १३ खर्ब रुपैयाँ बराबरको वैदेशिक व्यापारमा नेपालले नौ खर्ब ५५ अर्ब ३४ लाख रुपैयाँ तीन लाख रुपैयाँ बराबरको व्यापार घाटा व्यहोरेको हो । 

गत वर्षको तुलनामा व्यापार घाटा १०.९१ प्रतिशतले बढेको छ । गत वर्षको सोही अवधिमा नेपालले आठ खर्ब ६१ अर्ब ३८ करोड २८ लाख रुपैयाँ बराबरको व्यापार घाटा व्यहोरेको थियो ।

यस अवधिमा नेपालको वैदेशिक व्यापार १५.७६ प्रतिशतले बढेको छ । माघ  मसातसम्म नेपालले १२ खर्ब ९१ अर्ब ६३ करोड २० लाख रुपैयाँ बराबरको वैदेशिक व्यापार गरेको छ । जबकी गत आवको सोही अवधिमा ११ खर्ब १५ अर्ब ७९ करोड २५ लाख रुपैयाँ बराबरको वैदेशिक व्यापार गरेको थियो ।  

आयात र निर्यातमा वृद्धि  

विभागका अनुसार यस अवधिमा आयात र निर्यात दुवैमा सुधार देखिएको छ । सात महिनामा सवा ११ खर्ब रुपैयाँ बराबरको वस्तु तथा सेवा आयात भएको भने साढे एक खर्बको वस्तु तथा सेवा निर्यात भएको छ 

माघसम्ममा आयात १३.६५ प्रतिशत र निर्यात ३२.१९ प्रतिशतले बढेको छ । विभागका अनुसार यस अवधिमा ११ खर्ब २३ अर्ब ४८ करोड ६२ लाख रुपैयाँ बराबरको वस्तु आयात भएको हो । गत वर्षको सोही अवधिमा ९ खर्ब ८८ अर्ब ५८ करोड ७७ लाख रुपैयाँ बराबरको वस्तु आयात भएको थियो । 

यस अवधिमा एक खर्ब ६८ अर्ब १४ करोड ५८ लाख २४ हजार रुपैयाँ बराबरको वस्तु निर्यात भएको छ । गत वर्ष एक खर्ब २७ अर्ब २० करोड ४८ लाख २९ हजार रुपैयाँ बराबरको वस्तु तथा सेवाको निर्यात भएको थियो ।

निर्यात वृद्धिले नेपाली उत्पादनको अन्तर्राष्ट्रिय बजारमा माग बढ्दै गएको संकेत गरेको छ । यद्यपी निर्यातको उच्च वृद्धि दरले पनि व्यापार घाटा कम गर्न खासै योगदान पुर्याउन सकेको छैन । 

विलासी वस्तु र पेट्रोलियम पदार्थको बढ्दो आयातले गर्दा देशको शोधनान्तर स्थितिमा चाप परिरहेको छ । माघ मसान्तसम्म एक खर्ब ८० अर्ब ७४ करोड रुपैयाँ बराबरको पेट्रोलियम पदार्थ आयात भएको छ । जसबाट सरकारले ७१ अर्ब ५९ करोड रुपैयाँ राजस्व समेत संकलन गरेको छ ।

यस अवधिमा नेपालले १५३ देशसँगको वैदेशिक व्यापार गरेको छ । जसमध्ये २८ देशसँगको व्यापार नाफामा छ भने १२५ देशसँगको व्यापार घाटामा रहेको छ ।