देउती गुट्खाको व्यापार एक अर्ब ३४ करोड नाघ्यो, सुपारी महंगिँदा नाफा मार्जिन खुम्चियो

काठमाडौं : देउती गुट्खा इन्डष्ट्रिज (डीजीआई) ले  एक वर्षमा सवा एक अर्बको व्यापार गरेको छ । कम्पनीले सन् २०२५ मा एक अर्ब ३४ करोड ४० लाख रुपैयाँको व्यापार गरेको हो । उक्त रकम अघिल्लो वर्षको तुलनामा ६.९२ प्रतिशतले बढी हो । कम्पनीले सन् २०२४ मा एक अर्ब २५ करोड ७० लाख रुपैयाँको व्यापार गरेको थियो । 

यसअघि कम्पनीले सन् २०२३ मा एक अर्ब १६ करोड १० लाख रुपैयाँ र सन् २०२२ मा एक अर्ब १५ करोड १० लाख रुपैयाँको व्यापार गरेको थियो । चालु आर्थिक वर्षको आठ महिनामा कम्पनीले ९० करोड ५० लाख रुपैयाँ बराबरको व्यापार गरिसकेको छ । 

कम्पनीको बिक्री परिमाण बढ्नुका साथै प्रति मेट्रिक टन औसत बिक्री मूल्य ०.५७ मिलियन रुपैयाँबाट बढेर ०.५९ मिलियन रुपैयाँ पुगेका कारण व्यापार बढेको कम्पनीले जनाएको छ । 

तर, कम्पनीको व्यापार बढेपनि सञ्चालन नाफा मार्जिन भने घटेको छ । सन् २०२४ मा १४.४१ प्रतिशत रहेको यस्तो मार्जिन घटेर १२.०१ प्रतिशतमा झरेको छ । कम्पनीले प्रयोग गर्ने प्रमुख कच्चा पदार्थ सुपारीको मूल्य बढेका कारण नाफा मार्जिन खुम्चिएको कम्पनीले जनाएको छ । 

कम्पनीले सवा एक अर्बको व्यापार गर्दा ६ करोड  रुपैयाँ खुद नाफा कमाएको छ । कम्पनीले सन् २०२४ मा सात करोड ७० लाख रुपौयँ खुद नाफा कमाएको थियो । त्यस्तै सन् २०२४ मा ९ करोड १० लाख रुपैयाँ रहेको कम्पनीको नगद प्रवाह घटेर ७ करोड ५० लाखमा पुगेको छ । 

सन् २०२५ मा कम्पनीको गियरिङ अनुपात २.६८ गुणा पुगेको छ, जुन अघिल्लो २.४५ गुणा रहेको थियो । ब्याज तिर्ने क्षमता पनि घटेर २.९५ गुणामा झरेको छ । 

कम्पनीका प्रवद्र्धक यज्ञ बहादुर ओली रहेका छन् । सन् २०१५ मा स्थापना भएको कम्पनीले ‘मेघा श्री’ र ‘मञ्जु श्री’ ब्रान्डमा गुट्खा तथा पान मसला उत्पादन गर्दै आएको छ । कम्पनीले देशभर २०० भन्दा बढी आधिकारिक डिलरमार्फत वितरण सञ्जाल विस्तार गरेको छ ।

बाँकेको जानकी गाउँपालिका–६, गनपुरमा रहेको कम्पनीको उद्योग सुक्खा बन्दरगाह नजिकै रहेकाले भारत हुँदै विभिन्न देशबाट कच्चा पदार्थ आयात गर्न सहज भएको छ। कम्पनीले प्रयोग गर्ने कच्चा पदार्थमध्ये ७८ प्रतिशत सुपारी, ८ प्रतिशत सुर्ती, ६ प्रतिशत म्याग्नेसियम कार्बोनेट पाउडर, ३ प्रतिशत कठा र ५ प्रतिशत अन्य सामग्री (भिस्क ग्लिसिरिन लगायत) विदेशबाट आयात गरिन्छ ।

कम्पनीले बैंकिङ कर्जा सुविधाका लागि कुल ७२ करोड ८० लाख रुपैयाँ बराबरको ऋण रेटिङ गराएको छ । कम्पनीले दीर्घकालिन कर्जाका लागि ३१ करोड ९२ लाख र अल्पकालिन कर्जाका लागि ४० करोड ८७ लाख रुपैयाँ बराबरको ऋण रेटिङ गराएको हो ।