आईपीओ जारी गरेको सोपान फर्मास्युटिकल्सले गर्यो ५० करोडको व्यापार, नाफा मार्जिन ५९ प्रतिशत

काठमाडौं : हालै सर्वसाधारणमा प्राथमिक शेयर (आईपीओ) निष्कासन गरेको सोपान फर्मास्युटिकल्स लिमिटेडले एकै वर्षमा ५० करोड माथिको व्यापार गरेको छ । 

कम्पनीले सन् २०२५ मा ५० करोड १० लाख रुपैयाँ बराबरको व्यापार गरेको हो । उक्त रकम अघिल्लो वर्षको तुलनामा २२९.६०० प्रतिशतले बढेको हो । सन् २०२४ मा कम्पनीले १५ करोड २० लाख रुपैयाँ बराबरको व्यापार गरेको थियो । 

यसअघि सन् २०२३ मा कम्पनीले १४ करोड रुपैयाँ बराबरको व्यापार गरेको थियो । कम्पनीले व्यवस्थापनले अपनाएको ‘पुस सेल्स मोडल’का कारण व्यापार बढेको जनाइएको छ । यस मोडलमार्फत डिलर तथा वितरकहरुलाई प्रोत्साहन प्रदान गर्दै उत्पादनको उपलब्धता र बजार पहुँच बढाइएको थियो । परिणाम स्वरुप बिक्री मात्र नभई बजार विस्तारको गति पनि तीव्र बनेको कम्पनीको दाबी छ । 

व्यापारसँगै कम्पनीको सञ्चालन नाफा मार्जिनमा पनि उल्लेख्य वृद्धि देखिएको छ । सन् २०२३ र २०२४ मा नकारात्मक रहेको कम्पनीको सञ्चालन नाफा मार्जिन सन् २०२५ मा ५९.३२ प्रतिशत कायम भएको छ । कम्पनीले अक्सिजन व्यवसायबाट औषधि तर्फ ध्यान केन्द्रीत गर्दा नाफा मार्जिन बढेको उल्लेख छ । 

सन् २०२५ मा प्रवद्र्धकहरुबाट २९ करोड ७० लाख रुपैयाँ अतिरिक्त पुँजी लगानी हुँदा कम्पनीको कुल ऋण इक्विटी अनुपात पनि १.४१ गुणाबाट घटेर ०.४६ गुणामा झरेको छ । अघिल्ला दुई वर्ष नकारात्मक रहेको कम्पनीको ब्याज तिर्ने क्षमता ५.२२ गुणा पुगेको छ । 

सन् २००९ मा स्थापना भएको सोपान फर्मास्युटिकल्स लिमिटेड नेपालमा जेनेरिक र सेफालोस्पोरिन औषधि उत्पादन गर्ने उद्योगमा रुपमा परिचित छ । कम्पनीका अध्यक्ष डा.अनिल पोखरेल रहेका छन् । 

कम्पनीको उत्पादन कारखाना ललितपुरको महालक्ष्मी नगरपालिका–८, विष्णुडोलमा रहेको छ भने कर्पोरेट कार्यालय काठमाडौंको तिनकुने–३२ मा रहेको छ । कम्पनीसँग हाल १३९ प्रकारका औषधि उत्पादन गर्ने र ७० प्रकारका औषधि बिक्री वितरण गर्ने अनुमति छ । कम्पनीले ट्याबलेट, क्याप्सुल, झोल औषधि, क्रिम र मलम जस्ता एलोप्थाथिक औषधि उत्पादन गर्दै आएको छ । 

कम्पनीले मेडिकल अक्सिजन तथा नाइट्रोजन ग्याँस उत्पादन तथा बिक्री वितरणको क्षेत्रमा पनि लगानी गरेको थियो । यस प्रयोजनका लागि २०७३ सालमा सम्बन्धित निकायहरूबाट व्यवसाय दर्ता र उद्योग दर्ता प्रमाणपत्र प्राप्त गरिएको थियो । 

हाल उक्त व्यवसाय कम्पनीको सहायक संस्था सोपान अक्सिजन लिमिटेडका नाममा उद्योग विभागमा दर्ता भइसकेको छ । उद्योगको प्रारम्भिक वातावरणीय परीक्षणका लागि २०८२ पुस ९ गते सार्वजनिक सुनुवाइ सम्पन्न भइसकेको छ र प्रतिवेदन प्राप्त गर्ने प्रक्रिया अघि बढिरहेको छ । 

एलोपेथिक औषधि उत्पादनका लागि कम्पनीले २०७३ चैत ३ गते महालक्ष्मी नगरपालिकाबाट व्यवसाय दर्ता प्रमाणपत्र प्राप्त गरेको थियो भने २०७४ वैशाख १२ गते उद्योग विभागबाट उद्योग दर्ता नं. ३७३१ अन्तर्गत ठूला उत्पादनमूलक उद्योगका रूपमा दर्ता भएको थियो ।

यही बैशाख ३ गतेदेखि सर्वसाधारणका लागि निष्कासन गरेको प्राथमिक शेयर (आईपीओ) निष्कासन गरेको छ । कम्पनीले आफ्नो जारी पूँजीको २५ प्रतिशत अर्थात् ४२ लाख ९० हजार कित्ता शेयर निष्कासन गर्न नेपाल धितोपत्र बोर्डबाट अनुमति पाएको थियो । 

जसमध्ये वैदेशिक रोजगारीमा रहेका नेपालीका लागि ४ लाख २९ हजार कित्ता बाँडफाँट भइसकेको छ भने बाँकीमध्ये कर्मचारी र सामूहिक लगानी कोषलाई छुट्याएर ३४ लाख ७४ हजार ९०० कित्ता शेयर सर्वसाधारणका लागि खुला गरिएको हो ।

आईपीओबाट प्राप्त पूँजीमध्ये २० करोड रुपैयाँ बैंक ऋण भुक्तानीमा, ७ करोड ५० लाख रुपैयाँ सहायक कम्पनीमा लगानी, ३ करोड ६५ लाख रुपैयाँ उद्योगमा भौतिक निर्माण, ३ करोड रुपैयाँ प्लान्ट, मेसिनरी तथा उपकरण खरिद, ३ करोड ७५ लाख रुपैयाँ नयाँ उत्पादन विकास तथा बजार विस्तार, र बाँकी ५ करोड रुपैयाँ कार्यशील पूँजीका रूपमा उपयोग गरिनेछ ।

कम्पनीले बैंकिङ कर्जा सुविधाका लागि ६९ करोड ९६ लाख रुपैयाँ बराबरको ऋण रेटिङ गराएको छ । कम्पनीले दीर्घकालिन कर्जाका लागि ४६ करोड ४८ लाख रुपैयाँ र अल्पकालिन कर्जाका लागि २३ करोड ४७ लाख रुपैयाँ बराबरको ऋण रेटिङ गराएको हो ।