बीमा दाबी भुक्तानीमा समस्या भए प्रमाणसहित उजुरी दिन प्राधिकरणको आग्रह 

काठमाडौं : नेपाल बीमा प्राधिकरणले बीमा दाबी भुक्तानीमा कुनै समस्या भएमा प्रमाणसहित उजुरी दिन सेवाग्राहीहरुलाई आह्वान गरेको छ ।

प्राधिकरणले एक सूचना जारी गर्दै बीमा कम्पनी, सर्भेयर वा अन्य सम्बन्धित पक्षबाट प्रचलित कानुन र व्यावसायिक आचारसंहिता विपरीत काम भएको भए त्यसविरुद्ध कारबाहीका लागि उजुरी दर्ता गर्न आग्रह गरेको हो।

पछिल्लो समय बीमाको दायित्व निर्धारण एवम् दाबी भुक्तानी गर्ने क्रममा केही बीमक, बीमकको कर्मचारी तथा सर्भेयरले बीमा सम्बन्धी प्रचलित कानून, नियामकीय व्यवस्था तथा व्यावसायिक आचारसंहिता विपरीत कार्य गरेको भन्ने गुनासाहरु प्राप्त भएको प्राधिकरणले जनाएको छ । 

सोही सन्दर्भमा प्राधिकरणले कुनै पनि बीमक, बीमकको कर्मचारी, बीमा सर्भेयर वा अन्य कुनै पक्षले दुखः दिएमा, गलत विवरण तयार गरेको, तथ्य लुकाएको वा तोडमोड गरेको, पक्षपातपूर्ण मूल्याङ्कन गरेको, अनुचित लाभ लिएको वा अन्य कुनै कानून विपरीत कार्य गरेको भए त्यस्तो कार्यमा संलग्न व्यक्तिका विरुद्ध बीमा ऐन, २०७९ बमोजिम कारबाहीको लागि सम्बन्धित सबै सरोकारवालालाई प्रमाणसहित उजुरी पेश गर्न आग्रह गरेको हो । 

उजुरी दर्ता गर्दा उजुरीकर्ताको नाम, ठेगाना र सम्पर्क नम्बर, सम्बन्धित बीमा कम्पनीको नाम, समस्याको स्पष्ट विवरण, बीमा दाबी नम्बर, बीमालेख ९पोलिसी० नम्बर तथा दाबीसँग सम्बन्धित कागजात, फोटो, भिडियो वा अन्य प्रमाण संलग्न गर्नुपर्ने प्राधिकरणले जनाएको छ।

साथै प्राधिकरणले प्राप्त उजुरी तथा प्रमाणहरूको गोपनीयता कायम राखी बीमा ऐन, २०७९ तथा अन्य प्रचलित कानूनबमोजिम अनुसन्धान गरी आवश्यक कारबाही प्रक्रिया अगाडि बढाइनेछ ।