इम्पेरिमेन्ट चार्ज घट्दा किसान लघुवित्तको नाफा बढ्यो

काठमाडौं : किसान लघुवित्त वित्तीय संस्था लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ। उक्त विवरण अनुसार लघुवित्तले १ करोड ३६ लाख रुपैयाँ खुद नाफा कमाएको छ।

उक्त नाफा अघिल्लो आवको सोही अवधिको तुलनामा १११०.६६ प्रतिशत अर्थात एक करोड २५ लाख रुपैयाँले बढी हो । जबकी अघिल्लो आवको सोही अवधिमा कम्पनीले ११ लाख २६ हजार रुपैयाँ नाफा कमाएको थियो । 

समिक्षा अवधिमा कम्पनीको इम्पेरिमेन्ट चार्ज घटेका कारण नाफा नाफा बढेको छ । गत असार मसान्तसम्म कम्पनीको खुद ब्याज आम्दानी भने घटेको छ । यस अवधिमा कम्पनीको खुद ब्याज आम्दानी २९.०३ प्रतिशतले घटेको छ भने कुल सञ्चालन आम्दानी २०.९७ प्रतिशतले घटेको छ ।

उक्त विवरण अनुसार गत चौथो त्रैमासम्म कम्पनीको इम्पेरिमेन्ट चार्ज घटेर २ करोड ४७ लाखमा झरेको छ । अघिल्लो आवमा यस्तो चार्ज १२ करोड २० लाख रुपैयाँ रहेको थियो । 

नाफासँगै लघुवित्तको प्रतिशेयर आम्दानी पनि बढेर २ रुपैयाँ ७० पैसा पुगेको छ। यस अवधिमा कम्पनीको सञ्चालन नाफा भने १४२ प्रतिशतले बढेको छ। गत असार मसान्तसम्म संस्थाको खराब कर्जा ४.८८ प्रतिशतबाट बढेर ५.९५ प्रतिशत पुगेको छ।