नेपालमै पहिलोपटक ‘पूर्ण सदस्य वडा’ घोषणा, २३ वडालाई पूर्ण सदस्य घोषणा गर्दै विकू बचत

गैंडाकोट : विकू बचत तथा ऋण सहकारी संस्थाले गैंडाकोट–९, लाई ‘पूर्ण विकू सदस्य वडा’ घोषणा गरेको छ । गैंडाकोट नगरपालिकाका नगर प्रमुख मदनभक्त अधिकारीले एक कार्यक्रमको बीच देशमै पहिलो पूर्ण विकू सदस्य वडा घोषणा गरेका हुन् ।

गैंडाकोट वडा नम्बर ९ का करिब ९४ प्रतिशत घर परिवार विकू बचतमा सदस्य बनेपछि वडालाई पूर्ण विकू सदस्य वडा घोषणा गरिएको संस्थाका सचिव प्रेमप्रसाद सापकोटा ‘राजु’ले जानकारी दिए । पछिल्लो तथ्यांक अनुसार यस वडामा २ हजार १ सय ८८ जनसंख्या रहेको छ । त्यसमध्ये १४ सय जनसंख्या विकू बचतमा आवद्ध छन् । १ सय ९६ जना आकुरा सदस्य पनि विकूमा आवद्ध रहेको सचिव सापकोटाले बताए । यस वडाका ४ सय ९२ घरधुरी मध्ये अहिले विकू सहकारीमा ४ सय ७० घरधुरीको आवद्धत छन् ।

घोषणा कार्यक्रममा बोल्दै गैंडाकोट नगरपालिकाका नगरप्रमुख मदनभक्त अधिकारीले विकूमार्फत विपन्न वर्गले पनि आफ्नो जीवनस्तर उकास्न पाएको बताए । उनले सहकारीले आफ्नो ध्येयलाई आत्मसात गर्दै अगाडी बढ्नुपर्ने बताए र विकूले सहकारी क्षेत्रमा सदस्यमैत्री बनेर गरेका उत्कृष्ट कार्यलाई आगामी दिनमा पनि निरन्तरता दिनुपर्ने बताए । 

त्यस्तै कार्यक्रममा बोल्दै उपप्रमुख शान्ति कोइरालाले गैंडाकोट ९ भाग्यमानी वडा भएको बताईन । सहकारी अभियानमा उत्कृष्ट रहेको नगरको विकूले देशमै पहिलोपटक पूर्ण सहकारी वडा घोषणा गर्नु सबैको लागि खुसीको कुरा भएको बताईन । 

विकू सहकारीका अध्यक्ष ओमप्रसाद सापकोटाले आफै केही गर्नुपर्छ भन्ने भावना भएका व्यक्तिहरु रहेकाले पूर्ण सदस्य वडा घोषणा गरिएको बताए । पूर्ण वडा घोषणा सँगै आन्तरिक आवश्यकताका आधारमा कार्यक्रम सञ्चालन गरिने उनले जानकारी दिए । वडा कार्यालय, नगरपालिकासँग सहकार्य गरी गैरवित्तीय कार्यक्रमलाई सहयोग गर्ने, सदस्यको क्षमताका आधारमा आत्मनिर्भर बनाउने खालका कार्यक्रम गरिने उनको भनाई छ ।  

गैँडाकोट ९ का वडाध्यक्ष धामनाथ सापकोटाले सहअस्तित्व, सहकार्य, सहलगानी नै सहकारी भएकाले आफ्नै वडाबाट पूर्ण सहकारी वडा घोषणा हुँदा खुसी लागेको बताए । उनले विकूसँग समन्वय र सहकार्य गरेर अगाडी बढ्ने समेत बताए । 

विकू बचतले नवलपरासी (बर्दघाट सुस्तापूर्व), नवलपरासी (बर्दघाट सुस्तापश्चिम) र चितवनका गरी १४३ वडामा २४ वटा सेवा केन्द्र मार्फत करिब १ लाख ३० हजार सदस्यलाई वित्तीय तथा गैरवित्तीय कार्यक्रम सञ्चालन गर्दै आएको संस्थाका प्रमुख अधिकृत माधव प्रसाद पौडेलले जानकारी दिए ।  यसरी देशमै पहिलो सहकारीले पूर्ण सहकारी सदस्य वडा घोषणा गर्न पाउनु विकूको लागि गौरवको विषय भएको उनको भनाई थियो ।

विकू बचतको २४ वटा सेवा केन्द्र छन् । यस वर्ष एउटा सेवा केन्द्रले १ वटा वडालाई ‘पूर्ण विकू सदस्य वडा’ घोषणा गर्ने लक्ष्य रहेको छ। विकू बचतले यसै वर्ष थप २३ वटा वडालाई ‘पूर्ण विकू सदस्य वडा’ घोषणा गर्नेछ ।