साढे तीन अर्बले बढ्यो निर्जीवन बीमाको व्यापार, पाँच कम्पनी अझै पुगेनन् अर्ब क्लबमा 

काठमाडौं : निर्जीवन बीमा कम्पनीहरुले चाल् आर्थिक वर्षको पुस मसान्तसम्ममा १९ अर्बबढीको बीमा व्यवसाय गरेका छन् । नेपाल बीमा प्राधिकरणले सार्वजनिक गरेको तथ्यांक अनुसार यस अवधिमा कम्पनीहरुले १४ लाख २१ हजार ७६ बीमालेख बिक्री गरी १९ अर्ब ३९ करोड ६० लाख रुपैयाँ बीमाशुल्क संकलन गरेका हुन् ।

गत मंसिर मसान्तसम्मको तुलनामा कम्पनीहरुको व्यवसाय साढे तीन अर्ब रुपैयाँले बढेको छ । मंसिर मसान्तसम्म कम्पनीहरुले ११ लाख ६१ हजार २५९ बीमालेख बिक्री गरी १५ अर्ब ७२ करोड १० लाख रुपैयाँ बराबरको व्यवसाय गरेका थिए । 

प्राधिकरणका अनुसार यस अवधिमा सर्वाधिक बीमा व्यवसाय गर्नेमा शिखर इन्स्योरेन्स कम्पनी रहेको छ । कम्पनीले यस अवधिमा एक लाख ५० हजार ७२२ बीमालृख बिक्री गरी २ अर्ब ४५ करोड ७ लाख रुपैयाँ बराबरको व्यापार गरेको हो ।

त्यस्तै, दोस्रोत्रैमास गरमाथा लुम्बिनी इन्स्योरेन्स कम्पनी (सलिको) रहेको छ । कम्पनीले यस अवधिमा एक लाख ४८ हजार ९२ बीमालेख बिक्री गरी दुई अर्ब ३४ करोड ७१ लाख रुपैयाँ बीमाशुल्क संकलन गरेको हो ।

सिद्धार्थ प्रिमियर इन्स्योरेन्स कम्पनीले पुस मसान्तसम्म एक लाख ५३ हजार ८४४ बीमालेख बिक्री गरी एक अर्ब ९७ करोड २६ लाख रुपैयाँ बीमाशुल्क संकलन गरेको छ भने नेको इन्स्योरेन्सले पुस मसान्तसम्म एक अर्ब ६१ करोड २९ लाख रुपैयाँ बराबरको बीमा व्यवसया गरेको छ ।

त्यसैगरी हिमालयन एभरेष्टले यस अवधिमा एक अर्ब ६७ करोड ७४ लाख रुपैयाँ बराबरको बीमा व्यवसाय गरेको छ त्यस्तै, आईजीआई प्रुडेसिन्यलले एक अर्ब ६६ करोड १२ लाख, युनाइटेड अजोडले एक अर्ब ३० करोड ६४ लाख र एनएलजीले एक अर्ब २५ करोड ३० लाख रुपैयाँ बराबरको बीमाशुलक संकलन गरेका छन् । 

पाँच कम्पनी पुगेनन् अर्ब क्लबमा

बजारमा आर्थिक गतिविधि सुस्त हुँदा बीमा कम्पनीहरुको विजनेश पनि घट्दै गएको हो । केही सिमित कम्पनीले अर्ब भन्दा माथिको व्यवसाय गर्दा पाँच कम्पनी अझै अर्ब क्लवमा पुग्न सकेका छैनन् ।

पुस मसान्तसम्म नेपाल इन्स्योरेन्सले ७५ करोड २ लाख २८ हजार रुपैयाँ, नेशनल इन्स्योरेन्स कम्पनीले ६१ करोड ५५ लाख ७१ हजार रुपैयाँ, दि ओरियन्टलले ९३ करोड ५१ लाख रुपैयाँ बराबरको व्यवसाय गरेको छ ।

यस अवधिमा राष्ट्रिय बीमा कम्पनीले ९० हजार ३३१ बीमालेख बिक्री गरी ६९ करोड ३३ लाख ५६ हजार रुपैयाँ बीमाशुल्क उठाएको छ भने प्रभु इन्स्योरेन्सले ९६ करोड ९८ लाख लाख रुपैयाँ बराबरको बीमा व्यवसाय गरेको प्राधिकरणको तथ्यांकमा उल्लेख छ ।

लघुबीमाको व्यवसाय साढे चार करोड

पुस मसान्तसम्ममा निर्जीवन बीमा अन्तर्गतका तीन लघुबीमा कम्पनीहरुले साढे चार करोडको व्यवसाय गरेका छन् । यस अवधिमा कम्पनीहरुले २० हजार ३७३ बीमालेख जारी गरी चार करोड ५० लाख ६७ हजार रुपैयाँ बराबरको व्यवसाय गरेका हुन् ।

यस अवधिमा नेपाल माइक्रो इन्स्योरेन्सले दुई करोड ३७ लाख रुपैयाँ, प्रोटेक्टिभ माइक्रो इन्स्योरेन्सले एक करोड ६५ लाख रुपैयाँ र स्टार माइक्रो इन्स्योरेन्सले ४७ लाख ८८ हजार रुपैयाँ बराबरको व्यवसाय गरेकोे हो ।