उपलब्धि सहकारीका सञ्चालक विरुद्ध मुद्दा दायर, ४६ करोड बचतमा ३७ करोड मात्रै लगानी

काठमाडौं : उपलब्धि बहुउद्देश्यीय सहकारी संस्थाका ११ सञ्चालकविरुद्ध जिल्ला अदालत काठमाडौंमा ठगी मुद्दा दायर भएको छ ।

सदस्यहरूको निक्षेप (बचत) फिर्ता नगरेको भन्दै उनीहरूविरुद्ध प्रहरीले जिल्ला अदालतमा शुक्रबार मुद्दा दायर गरेको हो । एक सय एक जना सदस्यको १८ करोड ४० लाख ५४ हजार ठगी गरेको अभियोग संस्थाका सञ्चालकहरु माथि छ । उपलब्धि सहकारीका अध्यक्ष विपिन शर्मा मिश्र, उपाध्यक्ष रोशन थापा, सचिव अनिलप्रसाद खनाल र कोषाध्यक्ष कृष्णप्रसाद भट्टराई लाई प्रतिवादी बनाइएको छ ।

त्यस्तै, सञ्चालक समितिका सदस्यहरू गीता सिलवाल, सुशीला दाहाल, नवराज पोखरेल, सानुराजा शिल्पकार, बिनु सुवेदी रहेका छन् । त्यस्तै संस्थाका सल्लाहकार देवराज शर्मा र प्रमुख कार्यकारी अधिकृत प्रतिभा निरौलालाई पनि प्रतिवादी बनाइएको छ । संस्थाका अध्यक्ष मिश्रको गत साउनमा मृत्यु भएको थियो । देवराज शर्मा पूर्व अध्यक्ष समेत हुन् ।

संस्थाका प्रमुख कार्यकारी अधिकृत प्रतिभा निरौला अध्यक्ष शर्माको श्रिमती हुन् । सदस्यको बचत रकम आफ्नो निजी कम्पनीमा लगानी गरी संस्थाको रकम हिनामिना गरेको प्रहरीले जनाएको छ । संस्थाका अध्यक्ष मिश्रले उपलब्धि प्रकाशन सेवामा ११ करोड ८१ लाख, पूर्वअध्यक्ष शर्माले करुणा इन्टेरियरमा आठ करोड ८२ लाख ऋण लिई फिर्ता नगरेपछि संस्था धराशयी बनेको हो । 

त्यस्तै प्रमुख कार्यकारी अधिकृत निरौलाले आफन्तको नाममा कर्जा दिएर संस्थाको बचत हिनामिना गरेको प्रहरीले जनाएको छ । प्रहरीले पूर्वअध्यक्ष देवराज शर्मा, उपाध्यक्ष रोशन थापा, कोषाध्यक्ष कृष्णप्रसाद भट्टराईलाई पक्राउ गरिसकेको छ । भने अन्य भने फरार छन् ।

संस्थाले सदस्यहरूलाई ४६ करोड २४ लाख फिर्ता गर्नुपर्ने र ३७ करोड ४० लाख रुपैयाँ कर्जा लगानी गरेको अनुुसन्धानबाट खुलेको छ ।