१३ अर्ब रुपैयाँ बराबरको ट्रेजरी बिल नविकरण गर्दै राष्ट्र बैंक, आज बोलकबोल हुने 

काठमाडौं : सरकारले ट्रेजरी बिल मार्फत साढे १३ अर्ब रुपैयाँ बढीको आन्तरिक ऋण उठाउने भएको छ । सोमबार (आज) १३ अर्ब ५ करोड रुपैयाँ बराबरको ट्रेजरी बिल जारी गर्न लागेको राष्ट्र बैंकको मुद्रा व्यवस्थापन विभागले जनाएको छ ।

राष्ट्र बैंकले सात अर्ब ७५ करोड रुपैयाँ बराबरको ९१ दिने, पाँच अर्ब ३० करोड रुपैयाँ बराबरको १८२ दिन अवधिको ट्रेजरी बिल नविकरण गर्न लागेको हो । 

बैंकका अनुसार ९१ दिन अवधिको ट्रेजरी २०८१ असार १९ गते र १८२ दिन अवधिको असोज १५ गते परिपक्क हुनेछ । उक्त ट्रेजरी बिलको बोलकबोल आज दिँउसो ३ बजे हुनेछ । मंगलबार बाँडफाँट हुनेछ ।

यसअघि राष्ट्र बैंकले पाँचअर्ब रुपैयाँ बराबरको २८ दिने, दश अर्ब ११ करोड २५ लाख रुपैयाँ बराबरको ९१ दिने र ६० करोड रुपैयाँ बराबरको १८२ दिने र पाँच अर्ब रुपैयाँ बराबरको ३६४ दिन अवधिको ट्रेजरी बिल जारी गरेको थियो । जसमा दश अर्ब ११ करोड २५ लाख रुपैयाँ बराबरको ९१ दिने अवधिको ट्रेजरी नयाँ र बाँकी नविकरण गरेको थियो ।