बैकिङ प्रणालीमा थुप्रियो एकैदिन १७ अर्ब निक्षेप, अन्तर बैंक ब्याजदर तीन प्रतिशत भन्दा तल 

काठमाडौं : बैंकिङ प्रणालीमा एकैदिन १७ अर्ब रुपैयाँ निक्षेप थपिएको छ । नेपाल राष्ट्र बैंकको पछिल्लो तथ्यांक अनुसार गत बुधबार विभिन्न बैंक तथा वित्तीय संस्थाहरुमा सो बराबरको निक्षेप थपिएको हो । 

गत बिहिबार बैंक तथा वित्तीय संस्थाहरूको निक्षेप एकै दिन १७ अर्बले बढेर ६३ खर्ब ८७ अर्ब रुपैयाँ पुगेको छ । अघिल्लो दिन अर्थात् असार १९ गते बुधबारसम्म बैंक तथा वित्तीय संस्थामा ६३ खर्ब ७० अर्ब रुपैयाँ निक्षेप रहेको थियो ।

बैंकका अनुसार उक्त दिन वाणिज्य बैंकहरुमा मात्रै एकै दिन १६ अर्ब रुपैयाँ निक्षेप थपिएको छ भने अन्य वित्तीय क्षेत्रमा ७ खर्ब २४ अर्ब रुपैयाँ निक्षेप रहेको छ । अघिल्लो दिनसम्म ५६ खर्ब ४७ अर्ब रुपैयाँ निक्षेप रहेको वाणिज्य बैंकमा सो दिन १६ अर्ब निक्षेप बढेर ६३ खर्ब ८७ अर्ब रुपैयाँ पुगेको छ ।

बैंक तथा वित्तीय संस्थाका निक्षेप थपिदै गएपनि कर्जा लगानी भने सुस्त देखिएको छ । सो अवधिमा बैंकिङ प्रणालीमा निक्षेप थपिदै जाँदा कर्जा लगानी भने स्थिर रहेको राष्ट्र बैंकको तथ्यांकमा उल्लेख छ ।

राष्ट्र बैंकका अनुसार बैंक तथा वित्तीय संस्थाले यस अवधिमा ५१ खर्ब ५२ अर्ब रुपैयाँ कर्जा लगानी गरेका छन् । जसमध्ये वाणिज्य बैंकहरुको कर्जा लगानी ४५ खर्ब ५७ अर्ब रुपैयाँ रहेको छ भने अन्य वित्तीय क्षेत्रले ५ खर्ब ९५ अर्ब रुपैयाँ कर्जा लगानी गरेका छन् ।

यसका साथै बैंकिङ्ग प्रणालीमा निक्षेप बढेसँगै अन्तर बैंक कारोबारको ब्याजदर र सिडि रेसियो दुबै घटेको राष्ट्र बैंकको तथ्यांकमा उल्लेख छ । हाल अन्तर बैंक कारोबारको ब्याजदर २.९५ प्रतिशत रहेको छ भने सिडि रेसियो ७८.५९ बिन्दुमा झरेको छ ।