वाणिज्य बैंकहरुले कमाए दुई महिनामा साढे १७ अर्ब नाफा, अर्ब क्लबमा पाँच बैंक 

काठमाडौं : हाल सञ्चालनमा रहेका २० वाणिज्य बैंकहरुले चालु आर्थिक वर्षको दुइई महिनामा साढे १७ अर्ब रुपैयाँ नाफा कमाएका छन् । भदौं मसान्तसम्म बैंकहरुले १७ अर्ब ६९ करोड रुपैयाँ नाफा कमाएका हुन् । 

उक्त नाफा गत वर्षको सोही अवधिको तुलनामा ६.३१ प्रतिशतले बढी हो । गत वर्षको भदौ मसान्तसम्म बैंकहरुले १६ अर्ब ६४ करोड रुपैयाँ नाफा कमाएका थिए । 

राष्ट्र बैंकको तथ्यांक अनुसार भदौं मसान्तसम्म बैंक तथा वित्तीय संस्थाहरुको नाफा २० अर्ब २१ करोड रुपैयाँ रहेको छ । जसमा वाणिज्य बैंकहरुको नाफा १७ अर्ब ६९ करोड, विकास बैंकहरुको नाफा एक अर्ब ६४ करोड र फाइनान्सहरुको नाफा ८७ करोड रुपैयाँ रहेको छ । 

यस अवधिमा सर्वाधिक नाफा कमाउनेमा नबिल बैंक रहेको छ । भदौं मसान्तसम्म बैंकले एक अर्ब ६६ करोड रुपैयाँ नाफा कमाएको हो । त्यस्तै यस अवधिमा नेपाल बैंकले ६७ करोड ८२ लाख र राष्ट्रिय वाणिज्य बैंकले ८८ करोड ३ लाख रुपैयाँ नाफा कमाएको छ । 

अर्ब क्लबमा पाँच बैंक 

सार्वजनिक तथ्यांक अनुसार चालु आवको भदौं मसान्तसम्म नबिलसहित पाँच बैंकले एक अर्ब भन्दाबढी नाफा कमाएको छन् । जसमा नबिल, नेपाल इन्भेष्टमेन्ट मेगा, हिमालयन, ग्लोबल आईएमई र कुमारी बैंक रहेका छन् । 

ग्लोेबल आईएमईले चलु आवको भदौं मसान्तसम्म एक अर्ब ५६ करोड ६१ लाख रुपैयाँ नाफा कमाएको छ । त्यस्तै नेपाल इन्भेष्टमेन्ट मेगा बैंकले एक अर्ब ४१ करोड २८ लाख, हिमालयन बैंकले एक अर्ब १६ करोड ८१ लाख, कुमारीले एक अर्ब ८ करोड ५० लाख रुपैयाँ नाफा कमाएको छ ।

अन्य बैंकको नाफा 

यस अवधिमा नेपाल बैंकले ६७ करोड ८२ लाख रुपैयाँ नाफा कमाएको छ भने राष्ट्रिय वाणिज्य बैंकले ८८ करोड ३ लाख रुपैयाँ नाफा कमाएको छ । त्यस्तै स्ट्याण्डर्ड चार्टडले ६० करोड ६२ लाख र नेपाल एसबिआईले ५३ करोड ३९ लाख रुपैयाँ नाफा कमाएको छ । 

त्यस्तै, एभरेष्ट बैंकले यस अवधिमा ८२ करोड ५५ लाख रुपैयाँ नाफा कमाएको छ भने एनआईसी एशियाले ५७ करोड ७५ लाख, माछापुच्छ्रे बैंकले ३९ करोड २५ लाख, लक्ष्मी सनराइजले ८६ करोड ४६ लाख, सिद्धार्थ बैंकले ६० करोड ५६ लाख र कृषि विकास बैंकले ८८ करोड ७० लाख रुपैयाँ नाफा कमाएको छ । 

त्यसैगरी यस अवधिमा सिटिजन इन्टरनेशनल बैंकले ५८ करोड ९८ लाख, प्राइम कमर्सियलले ९७ करोड ४६ लाख, एनएमबि बैंकले ७८ करोड २ लाख, प्रभु बैंकले ९१ करोड ३२ लाख र सानिमा बैंकले ६८ करोड ९२ लाख रुपैयाँ नाफा कमाएको छ ।