स्वास्थ्य बीमा वापत साढे ५८ अर्ब भुक्तानी, पहिलो त्रैमासमा पठायो सवा तीन अर्ब 

काठमाडौं : स्वास्थ्य बीमा बोर्डले चालु आर्थिक वर्षमा स्वास्थ्य बीमा वापतको सवा तीन अर्ब रुपैयाँ भुक्तानी गरेको छ । बोर्डले प्रथम दाबी भुक्तानी वापत ३ अर्ब २१ करोड ५७ लाख ७४ हजार ८७७ रुपैयाँ पठाएको हो । 

गत असोज ११ गतेको बोर्डको निर्णयअनुसार स्वास्थ बीमा कार्यक्रम सञ्चालन गरेका सेवा प्रदायक केन्द्रहरुमा प्रथम पटकको भुक्तानी पठाएको हो ।

गत वर्षमा मात्रै बोर्डले सवा १३ अर्ब रुपैयाँ बराबरको दाबी भुक्तानी गरेको छ । बोर्डले २०८०/८१ को असार मसान्तसम्म छैठौंँ पटक गरी १३ अर्ब १६ करोड ९ लाख ४३ हजार १६ रुपैयाँ बराबरको दाबी भुक्तानी गरेको हो ।

हालसम्म बोर्डले स्वास्थ्य बीमा बापतको साढे ५८ अर्ब रुपैयाँ दाबी भुक्तानी गरिसकेको छ । बोर्डले स्वास्थ्य बीमा कार्यक्रम शुरु भएदेखि हालसम्म बीमा वापतको ५८ अर्ब ७४ करोड ९५ लाख ६४ हजार रुपैयाँ बराबरको दाबी भुक्तानी गरेको हो ।

बोर्डका अनुसार हालसम्म सात प्रदेशका ३६१ वटा सेवा प्रदायक संस्थाहरुले स्वास्थ्य बीमा कार्यक्रम सञ्चालन गरेका छन् ।