निर्जीवन बीमा कम्पनीहरुको व्यापार २४ अर्बमाथि, दुई कम्पनी पुगेनन् अर्ब क्लबमा  

काठमाडौं : पछिल्लो समय निर्जीवन बीमा कम्पनीहरुले व्यवसाय विस्तारमा सुधार देखिएको छ । चालु आर्थिक वर्षको सात महिनामा कम्पनीहरुको व्यापार २४ अर्ब माथि रहेको छ ।

नेपाल बीमा प्राधिकरणका अनुसार चालु आवको माघ मसान्तसम्म कम्पनीहरुले १६ लाख २१ हजार ६७९ बीमालेख जारी गरी २४ अर्ब २७ करोड ४१ लाख रुपैयाँ बराबरको बीमा शुल्क संकलन गरेका छन् ।

उक्त रकम गत आवको सोही अवधिको तुलनामा ७.८० प्रतिशत अर्थात एक अर्ब ७५ करोड ७४ लाख रुपैयाँले बढी हो । गत आवको सोही अवधिमा कम्पनीहरुले १६ लाख ७१ हजार १०६ बीमालेख जारी गरी २२ अर्ब ५१ करोड ६७ लाख रुपैयाँ बराबरको व्यवसाय गरेका थिए ।

प्राधिकरणका अनुसार माघ मात्रै कम्पनीहरुले दुई लाख ३२ हजार ३६१ बीमालेख बिक्री गरी तीन अर्ब ३९ करोड ५ लाख रुपैयाँ बीमाशुल्क संकलन गरेका छन् ।

प्राधिकरणका अनुसार माघ मसान्तसम्म १२ कम्पनीहरुले एक अर्बमाथिको व्यापार गरेका छन् । सर्वाधिक बीमा व्यवसाय गर्नेमा शिखर इन्स्योरेन्स रहेको छ । इन्स्योरेन्सले एक लाख ७३ हजार ८४६ बीमालेख जारी गरी तीन अर्ब १३ करोड २० लाख रुपैयाँ बराबरको व्यवसाय गरेको छ ।

त्यस्तै सगरमाथा लुम्बिनी इन्स्योरेन्सले एक लाख ६२ हजार ९६३ बीमालेख बिक्री गरी दुई अर्ब ९३ करोड ७६ लाख रुपैयाँ बीमाशुल्क संकलन गरेको भने सिद्धार्थ प्रिमियरले एक लाख ७६ हजार ८३९ बीमालेख बिक्री गरी दुई अर्ब ४४ करोड ७४ लाख रुपैयाँ बीमाशुल्क संकलन गरेको छ ।

यसैगरी माघ मसान्तसम्म हिमालयन एभरेष्ट इन्स्योरेन्सले एक अर्ब ९२ करोड १८ लाख रुपैयाँ बीमाशुल्क आर्जन गरेको छ । त्यस्तै नेको इन्स्योरेन्सले एक अर्ब ९५ करोड दुुई लाख र आईजीआई प्रुडेसिन्यलले दुई अर्ब दुई करोड ६८ लाख रुपैयाँ बराबरको व्यापार गरेको छ ।

नेपाल इन्स्योरेन्सले यस अवधिमा एक अर्ब २५ करोड ९५ लाख रुपैयाँ बराबरको व्यवसाय गरेको छ । त्यस्तै दि ओरियन्टल इन्स्योरेन्सले एक अर्ब ५२ करोड ५२ लाख रुपैयाँको व्यापार गरेको छ भने एनएलजीले एक अर्ब ६२ करोड १६ लाख रुपैयाँ बीमाशुल्क उठाएको छ ।

प्राधिकरणका अनुसार युनाइडेड अजोड इन्स्योरेन्सले एक अर्ब ४० करोड १४ लाख रुपैयाँ बराबरको बीमाशुल्क संकलन गरेको छ भने सानिमा जिआईसीले एक अर्ब ३८ करोड ५२ लाख रुपैयाँ र प्रभु इन्स्योरेन्सले एक अर्ब ३ करोड ८ लाख रुपैयाँ बराबरको व्यवसाय गरेको छ ।

दुई कम्पनी पुगेनन् अर्ब क्लबमा 

प्राधिकरणका अनुसार चालु आवको छ महिनामा अधिकांश कम्पनीले अबौंको व्यवसाय गरेका छन् भने दुई कम्पनीको व्यवसाय भने करोडमा खुम्चिएको छ ।

यस अवधिमा राष्ट्रिय बीमा कम्पनीले ९४ करोड ५ लाख १७ हजार रुपैयाँ बराबरको बीमाशूल्क संकलन गरेको छ भने नेशनल इन्स्योरेन्सले ६९ करोड ३४ लाख ७८ हजार रुपैयाँ बराबरको व्यवसाय गरेको प्राधिकरणको तथ्यांकमा उल्लेख छ । 

लघु बीमाको व्यापार ५० करोड माथि

प्राधिकरणका अनुसार यस अवधिमा सञ्चालनमा रहेका चार लघुबीमा कम्पनीले ५० करोडको व्यवसाय गरेका छन् । कम्पनीहरुले दुई लाख २४८ बीमालेख जारी गरी ५० करोड २८ लाख ९० हजार रुपैयाँ बीमाशुल्क उठाएका हुन् । 

चालु आवको यस अवधिमा नेपाल माइक्रो इन्स्योरेन्सले सबैभन्दा बढी १४ करोड ६८ लाख रुपैयाँ बराबरको व्यवसाय गरेको छ । त्यस्तै प्रोटेक्टिभ माइक्रो इन्स्योरेन्सले १२ करोड ४९ लाख, स्टार माइक्रोले ११ करोड ६६ लाख र ट्रस्ट माइक्रो इन्स्योरेन्सले ११ करोड ४३ लाख रुपैयाँ बराबरको व्यवसाय गरेको छ ।