लाभांश पारित गर्न सिटिजन लाइफले बोलायो साधारण सभा, बुक क्लोज कहिले ? 

काठमाडौं : सिटिजन लाइफ इन्स्योरेन्सले चैत १५ गते वार्षिक साधारण सभा बोलाएको छ । कम्पनीले गत आर्थिक वर्षको मुनाफाबाट घोषणा गरेको लाभांश प्रस्ताव पारित गर्न साधारणसभा बोलाएको हो । 

उक्त सभा आम्रपाली ब्यांकेट, भाटभटेनी, नक्साल, काठमाडौंमा बिहान ११ बजे सुरु हुनेछ । सभाले हाल कायम चुक्ता पुँजीको २६.९८ प्रतिशत बोनस शेयर र सोको कर प्रयोजनका लागि १.४२  प्रतिशत नगद लाभांश वितरण गर्ने प्रस्ताव पारित गर्नेछ । 

यस्तै, सभाले कम्पनीको वार्षिक प्रतिवेदन, नाफा नोक्सान हिसाब तथा नगद प्रवाह विवरणमा छलफल गरी पारित गर्ने र चालु आवका लागि लेखापरीक्षक नियुक्त गरी निजको पारिश्रमिक निर्धारण गर्ने प्रस्ताव पारित गर्नेछ । 

साधारणसभा प्रयोजनका लागि कम्पनीले फागुन २८ गते बुक क्लोज गर्ने भएको छ । जस अनुसार फागुन २७ गतेसम्म कायम शेयरधनीले मात्र कम्पनीको साधारणसभामा भाग लिन र प्रस्तावित लाभांश पाउन सक्नेछन् ।