नेपालको आईटी क्षेत्रलाई प्रवर्द्धन गर्ने अध्यादेश पारित भएपछि नास आईटीद्वारा स्वागत

काठमाडौं : नेपाल सफ्टवेयर तथा आईटी सेवा कम्पनीहरूको संघ (नास आईटी) ले नेपालको संघीय संसद् र नेपाल सरकारलाई नेपालको सूचना प्रविधि क्षेत्रका लागि नियमहरू सुधार गर्ने अध्यादेश पारित गरेकोमा आभार व्यक्त गरेको छ । 

यो निर्णय नेपालको डिजिटल अर्थतन्त्रलाई मजबुत बनाउन तथा विश्वव्यापी प्रविधि बजारमा नेपालको प्रतिस्पर्धात्मक क्षमतालाई अभिवृद्धि गर्न महत्त्वपूर्ण कदम हुने जनाईएको छ।

अध्यादेशले आईटी तथा डिजिटल सेवा कम्पनीहरूलाई व्यवसाय सञ्चालन गर्न सजिलो बनाउनेछ, लगानी भित्र्याउन सहज बनाउनेछ, र नेपाललाई प्रविधि तथा नवाचारको केन्द्रको रूपमा स्थापित गर्ने दिशामा महत्वपूर्ण योगदान पुर्‍याउनेछ। यो सफलता सरकारका पदाधिकारीहरू, नीति निर्माताहरू, उद्योगका अग्रणीहरू, र प्रविधि क्षेत्रका अगुवाहरूबीचको निरन्तर संवाद, सहकार्य, र लक्ष्यप्रति साझा प्रतिबद्धताको परिणामस्वरूप सम्भव भएको हो।

नास आईटी संघीय संसद्का सांसदहरु, उद्योग विज्ञहरू, र यस क्षेत्रमा क्रियाशील संस्थाहरूलाई यस अध्यादेशलाई सफलतापूर्वक पारित गराउन महत्वपूर्ण योगदान दिएकोमा हार्दिक धन्यवाद व्यक्त गर्दछ। नास आईटी नेपालको डिजिटल भविष्यलाई अझ मजबुत बनाउने थप नीतिगत सुधारहरूका लागि निरन्तर प्रयत्नशील रहनेछ।

नेपालको सफ्टवेयर तथा आईटी उद्योगको प्रतिनिधि संस्थाका रूपमा, नास आईटी नवप्रवर्तनलाई प्रवर्द्धन गर्ने, बजार विस्तार गर्ने, तथा विश्वव्यापी अवसरहरू सिर्जना गर्ने नीतिहरूको पैरवी गर्न जारी राख्नेछ। यो अध्यादेश नेपालको प्रविधि क्षेत्रमा नयाँ सम्भावनाहरूको शुरुवात हो।

नास आईटी नेपालकै अग्रणी गैर(नाफामुखी संस्था हो, जसको मुख्य उद्देश्य नेपालको सफ्टवेयर तथा आईटी उद्योगको वृद्धिमा योगदान पुर्‍याउनु हो। नीति सुधारको पैरवी गर्ने, नवाचारलाई प्रोत्साहित गर्ने, दक्ष जनशक्ति विकास गर्ने, र सहकार्यलाई प्रवर्द्धन गर्ने नास आईटीको प्रमुख लक्ष्य रहेको छ। यी प्रयासहरू मार्फत, नास आईटीले नेपाललाई विश्व प्रविधि उद्योगमा प्रभावशाली केन्द्रको रूपमा स्थापित गर्ने लक्ष्य राखेको छ।