सस्तो ब्याजको मौका छोप्दै सरकार, ४.७३ प्रतिशत ब्याजदरमै उठायो दुई खर्ब बढी आन्तरिक ऋण 

काठमाडौं : बैंकिङ प्रणालीमा लामो समयदेखि लगानी योग्य रकम (तरलता) थुप्रिदै जाँदा त्यसको फाइदा सरकारले लिएको छ । बजारमा मागमा संकुचन आउँदा बैंकहरुले कर्जा लगानी गर्न सकिरहेका छैनन् । फलस्वरुप राष्ट्र बैंकले सस्तो ब्याजमानै बैंकिङ प्रणालीबाट निरन्तर तरलता प्रशोचन गरिरहेको छ । 

बैंकिङ प्रणालीमा अधिक तरलता थुप्रिदै जाँदा सरकारले सस्तो ब्याजमानै अल्पकालीन तथा दीर्घकालीन ऋण परिचालनलाई जोड दिएको हो । सार्वजनिक ऋण व्यवस्थापन कार्यालयका अनुसार चालू आर्थिक वर्षको जेठ २९ गतेसम्ममा सरकारले दुई खर्ब रुपैयाँ बढी आन्तरिक ऋण उठाएको छ ।

सरकारले औसत ४.७३ प्रतिशतको ब्याजदरमा नै कूल दुई खर्ब १० अर्ब ९५ करोड रुपैयाँ ऋण उठाएको हो । यस अवधिमा विकास ऋणपत्र मार्फत २२ पटक गरी ३ वर्षदेखि ११ वर्षसम्मको लामो अवधिका सो रकम बराबरको ऋण उठाएको हो ।

चालु आर्थिक वर्षका लागि कूल १८ खर्ब ६० अर्ब ३० करोड रुपैयाँ बराबरको बजेट ल्याएको सरकारले १४ खर्ब राजस्वबाट उठाएर खर्च गर्ने र बाँकी करिब ५ खर्ब रुपैयाँ स्रोत ऋणमार्फत व्यहोर्ने जनाएको छ । 

पछिल्लो समय बैंक तथा वित्तीय संस्थाहरुमा निक्षेप थपिदै गएको छ । बजारमा तरलता सहज भएसँगै सरकारले सस्तो ब्याजदरमा ऋण उठाएको हो । 

यस अवधिमा बैंकिङ प्रणालीमा ६९ खर्ब ८६ अर्ब रुपैयाँ निक्षेप रहेको छ । जसमध्ये वाणिज्य बैंकहरुमा ६२ खर्ब ४९ अर्ब रुपैयाँ निक्षेप रहेको छ भने अन्य बैंक तथा वित्तीय संस्थाको निक्षेप सात खर्ब ३८ अर्ब रुपैयाँ रहेको छ ।