सरकारी ढुकुटीमा करिब तीन खर्बले बढ्यो नगद मौज्दात, क्यास सर्कुलेशन साढे सात खर्ब 

काठमाडौं : गत आर्थिक वर्षमा बजारमा ७० अर्ब रुपैयाँ भन्दा बढीले नगद प्रवाह (करेन्सी ईन सर्कुलेशन) बढेको छ । नेपाल राष्ट्र बैंकका अनुसार असार मसान्तसम्ममा बजारमा सात खर्ब ५० अर्ब ११ करोड २४ लाख रुपैयाँ नगद प्रवाह भएको छ ।

उक्त रकम अघिल्लो आवको तुलनामा १०.३० प्रतिशत अर्थात ७० अर्ब ६ करोड ३६ लाख रुपैयाँले बढेको हो । गत वर्ष बजारमा यस्तो नगद प्रवाह छ खर्ब ८० अर्ब ४ करोड ८८ लाख रुपैयाँ नगद प्रवाह भएको थियो ।

राष्ट्र बैंकका अनुसार यस अवधिमा सरकारी खाताको नगद मौज्दात दुई खर्ब ९८ अर्ब ६० करोड रुपैयाँले बढेको छ । अघिल्लो असारमा सरकारी खातामा तीन खर्ब ५५ अर्ब ४५ करोड रुपैयाँ मौज्दात रहेको थियो । यो रकम सरकारले खर्च गरेर बाँकी रहेको रकम हो । 

यस अवधिमा सरकारी ढुकुटीमा साढे ७० अर्ब रुपैयाँ निक्षेप रहेको जनाएको छ । यस अवधिमा विभिन्न बैंकहरुमा रहेको सरकारी खातामा कूल ७० अर्ब ८३ करोड ७० लाख रुपैयाँ निक्षेप रहेको बैंकले राष्ट्र बैंकले जनाएको हो । 

२०८१ असारसम्म यस्तो निक्षेप जम्मा ६३ अर्ब ९५ करोड ३३ लाख रुपैयाँ मात्र रहेको थियो । उक्त यस अवधिमा आइपुग्दा छ अर्ब ८८ करोड ३७ लाख रुपैयाँले बढेको छ । 

यस अवधिमा सरकारको सरप्लस मौज्दात शुन्य रहेको छ । असार मसान्तसम्म राष्ट्र बैंकको रिजर्भमा सात खर्ब ८ अर्ब एक करोड ३८ लाख रुपैयाँ रहेको छ । अघिल्लो असारसम्म रिजर्भमा ५ खर्ब ४३ अर्ब ८१ करोड ८१ लाख रुपैयाँ थियो । आईएमएफसँग सम्बन्धित दायित्व ४० अर्ब ९८ करोड ५ लाख रुपैयाँ रहेको छ ।

हालसम्म राष्ट्र बैंकको दायित्व २६ खर्ब ५९ अर्ब १३ करोड २३ लाख रुपैयाँ रहेको छ । अघिल्लो वर्ष २० खर्ब ६७ अर्ब २ करोड ४३ लाख रुपैयाँ रहेको थियो ।