आईपीओ निष्कासनको अनुमति माग्दै इलेक्ट्रो पावरले दियो बोर्डमा आवेदन, सवा ८१ करोडको शेयर जारी गर्दै 

काठमाडौं : इलेक्ट्रो पावर कम्पनी लिमिटेडले सर्वसाधारणमा प्राथमिक शेयर (आईपीओ) निष्काशन गर्न नेपाल धितोपत्र बोर्डमा अनुमति मागेको छ ।

कम्पनीले प्रतिकित्ता १०० रुपैयाँ अंकित दरमा आईपीओ निष्कासनको अनुमति माग गर्दै बोर्डमा आवेदन दिएको हो ।

इलेक्ट्रो पावरले ८१ करोड २५ लाख रुपैयाँ बराबरको ८१ लाख २५ हजार कित्ता शेयर निष्काशन गर्न मंसिर १ गते बोर्डमा निवेदन दर्ता गराएको हो।कम्पनीको आईपीओ निष्कासन तथा बिक्री प्रबन्धकमा एनआईएमबि एस क्यापिटल रहेको छ।

कम्पनीले सिन्धुपाल्चोकमा ४४ मेगावाटको भोटेकोशी १ जलविद्युत आयोजना निर्माण गरिरहेको छ। उक्त कम्पनीमा सगरमाथा जलविद्युत कम्पनीको १८ प्रतिशत, नेशनल इक्विटी फण्ड १ को १४ प्रतिशत, कभी होल्डिग प्रालिको ६ प्रतिशत, एनआईबिएल इक्विटी पार्टनर्सको ६ प्रतिशत शेयर लगानी रहेको छ । 

कम्पनीका अध्यक्ष समेत रहेका मोहन विक्रम कार्कीको भने ६ प्रतिशत शेयर लगानी रहेको छ। कम्पनीको अन्य संचालकमा माधव प्रसाद मैनाली, दिपक राज जोशी, श्रीजेश गुरागाई, कुन्ती देवी लिम्बु र डा. भोगेन्द्र कुमार गुरागाई रहेका छन् ।