चार रुग्ण उद्योग निजीकरणको प्रक्रिया अघि बढ्योः परामर्शदाताको आर्थिक प्रस्ताव मंसिर २१ गते खोलिने

काठमाडौं : अर्थ मन्त्रालयले लामो समयदेखि बन्द तथा रुग्ण अवस्थामा रहेका चार सार्वजनिक उद्योगलाई निजीकरण गर्ने प्रक्रियालाई थप तीव्रता दिएको छ । यी उद्योगहरूको सम्पत्ति तथा दायित्व मूल्याङ्कन गर्नका लागि छनोट भएका परामर्शदाता कम्पनीहरूको आर्थिक प्रस्ताव आगामी मंसिर २१ गते खोल्ने तयारी गरिएको छ ।

निजीकरणको तयारी गरिएका चार उद्योगहरूमा जनकपुर चुरोट कारखाना, बुटवल धागो कारखाना, नेपाल मेटल कम्पनी र नेपाल ओरियन्ट म्याग्नेसाइट रहेका छन् । अर्थ मन्त्रालयले गत साउनमा आह्वान गरेको टेन्डरबाट चारै उद्योगको डीडीएका लागि परामर्शदाता कम्पनीहरूको प्राविधिक प्रस्ताव मूल्याङ्कन गरिसकेको छ ।

प्राप्त प्रस्तावहरूमध्ये ६ वटा कम्पनी प्राविधिक प्रस्तावमा सफल भएका छन्। यीमध्ये नेपाल मेटल कम्पनी र जनकपुर चुरोट कारखानाका लागि दुई–दुई कम्पनी छनोट भएका छन् । 
यसअघि साउनमा जनकपुर चुरोट कारखानाका लागि ८, नेपाल ओरियण्ड म्याग्नेसाइटका लागि ११, बुटवल धागो कारखानाका लागि १२ र नेपाल मेटल कम्पनीका लागि ११ वटा कन्सल्टिङ कम्पनीलाई सर्टलिष्ट गरिएको थियो । 

अर्थ मन्त्रालयद्वारा जारी सूचनाअनुसार, छनोट भएका कम्पनीहरूले पेस गरेको आर्थिक प्रस्ताव मंसिर २१ गते खोलिने छ । आर्थिक प्रस्तावमा सफल हुने कम्पनीले ती उद्योगहरूको सम्पत्ति तथा दायित्वको विस्तृत मूल्याङ्कन गर्नेछन् । 

यसका साथै डीडीए रिपोर्ट प्राप्त भएपछि सोही मूल्याङ्कनलाई आधार मानेर इच्छुक निजी क्षेत्रलाई टेन्डर आह्वान गरी यी रुग्ण उद्योगहरूको निजीकरणको औपचारिक प्रक्रिया सुरु गरिने योजना रहेको अर्थमन्त्रालयले जनाएको छ ।