ऋणको भार घटाउँदै अशोक स्टिलः एक वर्षमा चार अर्ब ३४ करोडको कारोबार, ब्याज भुक्तानीमा अझै दबाब

काठमाडौं : पछिल्ला वर्षहरुमा अशोक स्टिल इन्डस्ट्री प्राइभेट लिमिटेडको आम्दानीमा उतारचढाव देखिएपनि सञ्चालन नाफामा भने सुधार गरेको छ । 

कम्पनीले सार्वजनिक गरेको वित्तीय विवरणअनुसार आर्थिक वर्ष २०२३ मा ६ अर्ब ६६ करोड रुपैयाँ सञ्चालन आम्दानी गरेको थियो । तर आर्थिक वर्ष २०२४ मा यो आम्दानी घटेर ३ अर्ब ५८ करोड रुपैयाँमा सीमित भयो ।

चालु आर्थिक वर्ष २०२५ मा भने कम्पनीको आम्दानी ४ अर्ब ३४ करोड ७० लाख रुपैयाँ पुगेको छ । जुन गत वर्षको तुलनामा ७६ करोड १० लाख रुपैयाँले बढी हो । पछिल्लो तथ्यांकले कम्पनी पुनः लयमा फर्किन थालेको देखिएको छ । 

वित्तीय विवरण अनुसार मार्जिनतर्फ कम्पनीको सञ्चालन नाफा सन् २०२३ मा ५.०२ प्रतिशत रहेकोमा सन् २०२४ मा उल्लेखनीय रूपमा बढेर ९.६९ प्रतिशत पुगेको थियो । यद्यपी सन् २०२५ मा भने यो मार्जिन घटेर ६.८७ प्रतिशतमा सिमित देखिन्छ । 

कम्पनीको ऋण व्यवस्थापनमा भने क्रमिक सुधार देखिएको छ । समग्र ऋण–इक्विटी अनुपात सन् २०२३ मा १९.०३ गुणा रहेको सन् २०२४ मा १७.०३ र सन् २०२५ मा १४.८४ गुणामा झरेको छ । यसले पनि कम्पनीको ऋणको भार घटेको देखिएको हो ।

तर, ब्याज भुक्तानी क्षमताको सूचक मानिने (इन्ट्रेस कभरेज रेसियो) भने सबै वर्षमा १.२ गुणाको आसपासमा सीमित देखिएको छ । जसले कम्पनीमाथि वित्तीय दबाब अझै रहेको पाइएको छ । 

कम्पनीले आफ्नो व्यावसायिक प्रयोजनका लागि कुल ३ अर्ब ३ करोड रुपैयाँ बराबरको कर्जा रेटिङ गराएको छ । जसमा दीर्घकालीन कर्जाका लागि एक अर्ब ७९ करोड २३ लाख रुपैयाँ र अल्पकालीन कर्जाका लागि एक अर्ब ६३ करोड ७७ लाख रुपैयाँ बराबरको रेटिङ गराएको हो । 

वि.स. २०४० फागुनमा स्थापना भएको अशोक स्टिलले नेपाली निर्माण सामग्री बजारमा तीन दशकभन्दा लामो अनुभव बटुलिसकेको छ । बारा जिल्लाको गढीमाई नगरपालिका–१० मा रहेको अशोक स्टिलले टीएमटी बार र एमएस बिलेट उत्पादन गर्दै आएको छ । 

वार्षिक १ लाख मेट्रिक टन टीएमटी बार उत्पादन क्षमता रहेको कम्पनी निर्माण तथा पूर्वाधार क्षेत्रको मागमा निर्भर रहेको छ । उद्योगले स्पन्ज आइरन र स्क्र्याप आइरन प्रयोग गरी आफ्नै ‘एमएस बिलेट’ समेत उत्पादन गर्दै आएको छ ।