इम्पेरिमेन्ट चार्ज बढ्दा सिन्धु विकास बैंक साढे एक करोड नोक्सानीमा, इपीएस पनि ऋणात्मक

काठमाडौं : सिन्धु विकास बैंक लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ। उक्त विवरण अनुसार बैंकले यस अवधिमा एक करोड ५४ लाख रुपैयाँ नोक्सानीमा रहेको छ । 

गत वर्षको सोही अवधिसम्ममा बैंकले चार करोड ८७ लाख रुपैयाँ खुद नाफा कमाएको थियो। समिक्षा अवधिमा बैंकको खुद ब्याज आम्दानीमा वृद्धि देखिएपनि इम्पेरिमेन्ट चार्ज बढेका कारण नाफा प्रभावित भएको हो । 

पुस मसान्तसम्म आइपुग्दा बैंकको खुद ब्याज आम्दानी ३.७१ प्रतिशतले बढेर पाँच करोड ८८ लाख रुपैयाँ पुगेको छ भने खुद फि तथा कमिशन आम्दानी ५४.९८ प्रतिशत र कुल सञ्चालन आम्दानी ७.८८ प्रतिशत बढेको छ । 

गत वर्ष छ करोड ९५ लाख रुपैयाँ रहेको बैंकको सञ्चालन मुनाफा एक करोड ५५ लाख रुपैयाँ ऋणात्मक रहेको छ । जसका कारण नाफामा असर परेको हो । गत वर्षको सोही अवधिमा आठ करोड ६२ लाख रुपैयाँ इम्पेरमेन्ट चार्ज रिभर्स हुँदा बैंक नाफामा पुगेको थियो । 

तर, चालु आवको यस अवधिमा भने बैंकको इम्पेरिमेन्ट चार्ज एक करोड ७८ लाख ८४ हजार रुपैयाँ पुगेको छ । जसका कारण बैंकको खुद नाफामा असर परेको हो । 

यस अवधिसम्ममा बैंकको वितरणयोग्य मुनाफा २२ करोड ८५ लाख रुपैयाँ ऋणात्मक रहेको छ । यद्यपी बैंकको खराब कर्जा भने घटेको छ । गत वर्ष ९.०६ प्रतिशत रहेको बैंकको खराब कर्जा बढेर ६.३९ प्रतिशतमा झरेको छ । 

नाफासँगै बैंकको प्रतिशेयर आम्दानी पनि ऋणात्मक रहेको छ । यस अवधिमा बैंकको यस्तो आम्दानी ५.५० रुपैयाँ ऋणात्मक रहेको हो । पुस मसान्तसम्ममा बैंकको प्रतिशेयर नेटवर्थ ९४.१९ रुपैयाँ रहेको छ । 

पुस मसान्तसम्म ५५ करोड ७४ लाख रुपैयाँ चुक्ता पूँजी रहेको बैंकको जगेडा कोष तीन करोड २३ लाख रुपैयाँ ऋणात्मक रहेको छ।