खराब कर्जा र इम्पेरिमेन्ट चार्जमा सुधार, मुक्तिनाथ विकास बैंकको नाफा र इपीएस दुवै उकालो

काठमाडौं : मुक्तिनाथ विकास बैंक लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ। उक्त विवरण अनुसार बैंकले यस अवधिमा ६७ करोड २० लाख रुपैयाँ खुद नाफा कमाएको छ।

उक्त नाफा अघिल्लो आर्थिक वर्षको सोही अवधिको तुलनामा ३३.५७ प्रतिशतले बढी हो। गत आवको सोही अवधिमा बैंकले ५० करोड ३१ लाख रुपैयाँ नाफा कमाएको थियो ।

पुस मसान्तसम्म आइपुग्दा बैंकको खुद ब्याज आम्दानी  र सञ्चालन मुनाफा बढेसँगै नाफा बढेको हो । साथै बैंकको इम्पेरिमेन्ट चार्ज घटेका कारण पनि नाफामा वृद्धि देखिएको हो । गत वर्ष ८२  करोड ७१ लाख रुपैयाँ रहेको बैंकको इम्पेरिमेन्ट चार्ज घटेर ६१ करोड छ लाख रुपैयाँमा झरेको छ । 

प्रकाशित वित्तीय विवरण अनुसार यस अवधिमा बैंकको खुद ब्याज आम्दानी ८.१४ प्रतिशत बढ्दा खुद फि तथा कमिशन आम्दानी भने ९.६१प्रतिशतले घटेको छ। त्यस्तै बैंकको कुल सञ्चालन आम्दानी ७.६१ प्रतिशत बढेको छ भने सञ्चालन मुनाफा ३५.०३ प्रतिशत बढेको छ।

गत वर्षको पुसम्ममा ३.९८ प्रतिशत रहेको बैंकको खराब कर्जा घटेर ३.७५ प्रतिशतमा झरेको छ । बैंकको वितरणयोग्य नाफा १९ करोड ५२ लाख रुपैयाँ रहेको छ भने वितरणयोग्य आम्दानी अर्थात लाभांश क्षमता ४.८८ प्रतिशत रहेको छ । 

नाफासँगै बैंकको प्रतिशेयर आम्दानी (इपीएस) पनि बढेको छ । यस अवधिमा बैंकको इपीएस २.५२ रुपैयाँले बढेर १६.८० रुपैयाँ रहेको छ । त्यस्तै बैंकको मूल्य आम्दानी अनुपात २०.७७ गुणा रहेको छ भने प्रतिशेयर नेटवर्थ १५१.३५ रुपैयाँ रहेको छ।

यस अवधिसम्ममा बैंकले एक खर्ब १५ अर्ब ३८ करोड रुपैयाँ निक्षेप संकलन गरेको छ भने ९८ अर्ब ५४ करोड रुपैयाँ कर्जा प्रर्वाह गरेको छ । पुस मसान्तसम्म आठ अर्ब तीन लाख रुपैयाँ चुक्ता पुँजी रहेको बैंकको जगेडा कोषमा चार अर्ब १० करोड ८३ लाख सञ्चिति रहेको छ ।