वाणिज्य बैंकहरुले कमाए आठ महिनामा पौने ४४ अर्ब नाफा, अर्ब क्लबमा पुगेनन् तीन बैंक 

काठमाडौं : चालु आर्थिक वर्षको आठ महिनामा वाणिज्य बैंकहरुले पौने ४४ अर्ब   नाफा कमाएका छन् । राष्ट्र बैंकका अनुसार फागुन मसान्तसम्म बैंकहरुले ४३ अर्ब ८८ करोड ४३ लाख रुपैयाँ नाफा कमाएका हुन् । 

उक्त नाफा गत वर्षको सोही अवधिको तुलनामा ०.८९ प्रतिशतले बढी हो । गत वर्षको फागुन मसान्तसम्म बैंकहरुले ४३ अर्ब ४९ करोड ६० लाख रुपैयाँ नाफा कमाएका थिए । 

यस अवधिमा आइपुग्दा ९ बैंकहरुको नाफा बढेको छ भने ११ वटाको नाफा घटेको छ । सर्वाधिक नाफा बढाउनेमा कुमारी बैंक रहेको छ । बैंकको नाफा गत वर्षको तुलनामा २७४.३४ प्रतिशतले बढेको हो । फागुन मसान्तसम्म आइपुग्दा लक्ष्मी सनराइज बैंकको नाफा ६७.३६ प्रतिशतले घटेको छ । 

सर्वाधिक नाफा कमाउनेमा नबिल बैंक  

यस अवधिमा सर्वाधिक नाफा कमाउनेमा नबिल बैंक रहेको छ । चालु आवको फागुन मसान्तसम्म बैंकले छ अर्ब सात करोड ४१ लाख रुपैयाँ नाफा कमाएको हो । जुन गत वर्षको तुलनामा २६.८७ प्रतिशतले बढी हो ।

गत वर्ष ४ अर्ब ७२ करोड ९४ लाख रुपैयाँ नाफा कमाएको ग्लोबल आईएमई बैंकले यस वर्ष चार अर्ब ६२ करोड २६ लाख रुपैयाँ नाफा कमाएको छ । जुन २.२६ प्रतितशले कम हो ।

राष्ट्र बैंकका अनुसार प्राइम कमर्सियल बैंकको नाफा ९.६८ प्रतिशतले बढेको छ भने राष्ट्रिय वाणिजइ बैंकको नाफा ३५.६८ प्रतिशतले बढेको छ । त्यस्तै सानिमा बैंकको २३.२१ प्रतिशत, सिद्धार्थको ६८.३१ प्रतिशत र कृषि विकास बैंकको नाफा ६५.५६ प्रतिशतले बढेको छ । 

तीन बैंकको नाफा करोडमा खुम्चियो 

चालु आवको आठ महिनामा आइपुग्दा तीन बैंकहरुको नाफा भने एक अर्बभन्दा कम रहेको छ । यस अवधिमा एनआईसी एशियाले ३० करोड ८२ लाख रुपैयाँ नाफा कमाएको छ भने लक्ष्मी सनराइज बैंकले ६५ करोड चार लाख र सिटिजन्स इन्टरनेशनल बैंकले ८० करोड रुपैयाँ रुपैयाँ नाफा कमाएको राष्ट्र बैंकको तथ्यांकमा उल्लेख छ ।  

राष्ट्र बैंकका अनुसार चालु आवको यस अवधिमा बैंक तथा वित्तीय संस्थाले ४९ अर्ब तीन करोड रुपैयाँ नाफा कमाएका छन् । उक्त नाफा गत आवको सोही अवधिको तुलनामा १.५१ प्रतिशतले बढी हो । गत वर्षको सोही अवधिमा बैंक तथा वित्तीय संस्थाले ४८ अर्ब ३० करोड रुपैयाँ नाफा कमाएका थिए । 

यस अवधिमा वाणिज्य बैंकहरुको नाफा ४३ अर्ब ८८ करोड, विकास बैंकहरुको नाफा चार अर्ब ४८ करोड ७० लाख र फाइनान्सहरुको नाफा ३६ करोड ७० लाख रुपैयाँ रहेको छ ।