वाणिज्य बैंकहरुले कमाए नौ महिनामा ४९ अर्बमाथि नाफा, तीन बैंक पुगेनन् अर्ब क्लबमा 

काठमाडौं : चालु आर्थिक वर्षको नौ महिनामा वाणिज्य बैंकहरुले सवा ४९ अर्ब रुपैयाँ खुद  नाफा कमाएका छन् । प्रकाशित वित्तीय विवरण अनुसार बैंकहरुले चैत मसान्तसम्म ४९ अर्ब २१ करोड २२ लाख रुपैयाँ नाफा कमाएका हुन् ।

उक्त नाफा गत वर्षको सोही अवधिको तुलनामा १९.३० प्रतिशतले बढी हो । गत वर्षको चैत मसान्तसम्म बैंकहरुले ४१ अर्ब २५ करोड ११ लाख रुपैयाँ नाफा कमाएका थिए ।

यस अवधिमा आइपुग्दा १३ बैंकहरुको नाफा बढेको छ भने सात वटाको नाफा घटेको छ । सर्वाधिक नाफा बढाउनेमा कुमारी बैंक रहेको छ । बैंकको नाफा गत वर्षको तुलनामा १३६१.७६ प्रतिशतले बढेको हो । चैतमसान्तसम्म आइपुग्दा प्रभु बैंकको नाफा ५४.६१ प्रतिशतले घटेको छ । 

सर्वाधिक नाफा कमाउनेमा नबिल बैंक  

यस अवधिमा सर्वाधिक नाफा कमाउनेमा नबिल बैंक रहेको छ । चालु आवको चैत मसान्तसम्म बैंकले छ अर्ब ७६ करोड ४६ लाख रुपैयाँ नाफा कमाएको हो । जुन गत वर्षको तुलनामा ३३.९२ प्रतिशतले बढी हो ।

गत वर्ष चार अर्ब ५३ करोड ४० लाख रुपैयाँ नाफा कमाएको ग्लोबल आईएमई बैंकले यस वर्ष चार अर्ब ४० करोड ११ लाख रुपैयाँ नाफा कमाएको छ । जुन २.९३ प्रतिशतले कम हो ।

राष्ट्र बैंकका अनुसार राष्ट्रिय वाणिज्य बैंकको नाफा १२९.३४ प्रतिशतले बढेको छ भने हिमालयन बैंकको नाफा ५२.४९ प्रतिशतले बढेको छ । त्यस्तै माछापुच्छ्रे बैंकको ५०.४३ प्रतिशत, सानिमाको ४२.२२ प्रतिशत र प्राइम कमर्सियल बैंकको नाफा ३८.५८ प्रतिशतले बढेको छ । 

अर्ब क्लबमा पुगेनन् तीन बैंक

चालु आवको नौ महिनामा आइपुग्दा तीन बैंकहरुको नाफा भने एक अर्बभन्दा कम रहेको छ । यस अवधिमा एनआईसी एशियाले १४ करोड तीन लाख रुपैयाँ नाफा कमाएको छ भने प्रभु बैंकले ८५ करोड १५ लाख र हिमालयन बैंकले ७६ करोड २५ लाख रुपैयाँ नाफा कमाएको राष्ट्र बैंकको तथ्यांकमा उल्लेख छ ।