Below Menu

जीवन बीमा कम्पनीहरुको व्यापार दुई खर्बमाथि, नेपाल लाइफले मात्रै उठायो साढे ५३ अर्ब बीमाशुल्क 

जीवन बीमा कम्पनीहरुको व्यापार दुई खर्बमाथि, नेपाल लाइफले मात्रै उठायो साढे ५३ अर्ब बीमाशुल्क 

काठमाडौं : जीवन बीमा कम्पनीहरुले गत आर्थिक वर्षमा दुई खर्ब रुपैयाँ बराबरको व्यवसाय गरेका छन् । नेपाल बीमा प्राधिकरणको तथ्यांक अनुसार असार मसान्तसम्म कम्पनीहरुले दुई खर्ब एक करोड ९१ लाख रुपैयाँ बराबरको व्यापार गरेका हुन् ।

Sponsored Advertisement

यस अवधिमा कम्पनीहरुले एक करोड १८ लाख ५० हजार ३९१ बीमालेख जारी गरी उक्त रकम बराबरको बीमाशूल्क संकलन गरेका हुन् ।

उक्त रकम अघिल्लो वर्षको तुलनामा १२.४२ प्रतिशत अर्थात २२ अर्ब ११ करोड २८ लाख रुपैयाँले बढी हो । कम्पनीहरुले अघिल्लो वर्ष एक करोड १५ लाख २७ हजार ९९४ बीमालखे जारी थगरी एक खर्ब ७७ अर्ब ९० करोड ६३ लाख रुपैयाँ बीमाशुल्क संकलन गरेका थिए । 

प्राधिकरणका अनुसार असारमा मात्रै कम्पनीहरुले ५ लाख ८२ हजार ४०७ बीमालेख जारी गरी २८ अर्ब आठ करोड ८२ लाख १७ हजार रुपैयाँ बराबरको बीमा व्यवसाय गरेका छन् । 

असार मसान्तसम्म आइपुग्दा सर्वाधिक बीमा व्यवसाय गर्नेमा नेपाल लाइफ इन्स्योरेन्स रहेको छ । कम्पनीले १९ लाख ८२ हजार ९२३ बीमालेख बिक्री गरी ५३ अर्ब ६८ करोड ८४ लाख रुपैयाँ बीमाशुल्क संकलन गरेको हो । 

प्राधिकरणका अनुसार यस अवधिमा नेशनल लाइफले १३ लाख ३३ हजार ६५९ बीमालेख जारी गरी २४ अर्ब ६८ करोड ५७ लाख ४९ हजार रुपैयाँको व्यापार गरेको छ । 

त्यस्तै लाइफ इन्स्योरेन्स कर्पोरेशनले सात लाख आठ हजार ५७ बीमालेख जारी गरी २१ अर्ब २३ करोड ३९ लाख ३४ हजार रुपैयाँ बराबरको व्यापार गरेको छ भने हिमालयन लाइफले १८ अर्ब ५६ करोड ५ लाख ८७ हजार रुपैयाँ बीमाशुल्क उठाएको छ । 

प्राधिकरणका अनुसार राष्ट्रिय जीवन बीमा कम्पनीले ५ लाख ६३ हजार २५८ बीमालेख जारी गरी ९ अर्ब ६४ करोड ५ लाख रुपैयाँ बराबरको व्यापार गर्दा मेट लाइफले छ अर्ब ८६ करोड तीन लाख रुपैयाँ बराबरको व्यवसाय गरेको छ ।

त्यस्तै एशियन लाइफले १० अर्ब ४३ करोड ६५ लाख ४८ हजार रुपैयाँ बराबरको व्यवसाय गर्दा आईएमई लाइफले ७ अर्ब ४५ करोड ४१ लाख रुपैयाँ र सन नेपाल लाइफले ४ अर्ब ६३ करोड १० लाख रुपैयाँ बराबरको व्यवसाय गरेको छ ।

असार मसान्तसम्म आइपुग्दा रिलायबल नेपाल लाइफले छ अर्ब ४२ करोड आठ लाख रुपैयाँ बराबरको व्यवसाय गरेको छ भने सिटिजन लाइफ इन्स्योरेन्सले ९ अर्ब १६ करोड ८९ लाख ७२ हजार रुपैयाँ बराबरको व्यवसाय गरेको छ ।

गत आर्थिक वर्षमा सूर्यज्योति लाइफले १२ अर्ब ९० करोड ६७ लाख, सानिमा रिलायन्सले ७ अर्ब ९९ करोड ४२ लाख र प्रभु महालक्ष्मी लाइफले छ अर्ब ३३ करोड ६९ लाख रुपैयाँ बराबरको बीमाशुल्क संकलन गरेको छ । 

लघुबीमाको व्यापार सवा एक अर्बमाथि  

प्राधिकरणका अनुसार लघुबीमा कम्पनीहरुले पनि व्यवसाय विस्तारमा तीव्रता दिइरहेका छन् । असार मसान्तसम्म कम्पनीहरुले २४ लाख ९३ हजार ३४७ बीमालेख जारी गरी एक अर्ब २१ करोड आठ लाख ९५ हजार रुपैयाँको व्यवसाय गरेका छन् ।

यस अवधिमा गार्डियन माइक्रो लाइफले ४२ करोड ६९ लाख रुपैयाँ, केष्ट माइक्रो लाइफले ४१ करोड ८० लाख रुपैयाँ र लिबर्टी माइक्रो लाइफले ३६ करोड ५८ लाख रुपैयाँ बीमाशुल्क संकलन गरेको तथ्यांकमा उल्लेख छ ।

यस अवधिमा कम्पनीहरुले वैदेशिक रोजगार म्यादी जीवन बीमा पुलबाट २४ लाख ४८ हजार ४९२ बीमालेख जारी गरी तीन अर्ब ३६ करोड ७० लाख रुपैयाँ बराबरको बीमाशुल्क संकलन गरेका छन् । 


 

थप समाचार