मकर जितुमाया सुरी हाइड्रोपावरले बेच्यो सवा ३९ करोडको बिजुली, खुद नाफा ६७ प्रतिशतले बढ्यो  

काठमाडौं : मकर जितुमाया सुरी हाइड्रोपावर लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ । उक्त विवरण अनुसार कम्पनीले सात करोड ८२ लाख ४३ हजार रुपैयाँ नाफा कमाएको छ । 

उक्त नाफा गत आवको सोही अवधिको तुलानमा ६७.५७ प्रतिशतले धेरै हो । अघिल्लो वर्ष कम्पनीले चार करोड ६६ लाख ९४ हजार रुपैयाँ खुद नाफा कमाएको थियो ।

समिक्षा अवधिमा कम्पनीको वित्तीय खर्च घटेका कारण नााफामा उल्लेख्य वृद्धि देखिएको हो । साथै कम्पनीको विद्युत बिक्री आम्दानीसँगै अन्य आम्दानी पनि बढेका कारण नाफा बढ्नमा राहत पुगेको हो । 

अघिल्लो वर्ष विद्युत बिक्रीमार्फत ३८ करोड ८६ लाख ३२ हजार रुपैयाँ आम्दानी गरेको कम्पनीको यस्तो आम्दानी असार मसान्तसम्म आइपुग्दा ३९ करोड २० लाख ९९ हजार रुपैयाँ पुगेको छ । जुन ०.८९ प्रतिशतले बढी हो । 

यस अवधिमा कम्पनीको अन्य आम्दानी ७ करोड ६९ लाख रुपैयाँबाट बढेर ९२ करोड ५३ लाख ५० हजार रुपैयाँ पुगेको छ भने सञ्चालन मुनाफा ०.३९ प्रतिशत घटेको छ । त्यस्तै, कम्पनीको वित्तीय खर्च भने समीक्षा अवधिमा १८.०६ प्रतिशतले घटेर १५ करोड ८५ हजार रुपैयाँमा झरेको छ ।

चौथो त्रैमाससम्म आइपुग्दा नाफासँगै कम्पनीको प्रतिशेयर आम्दानी पनि ६.१४ रुपैयाँबाट बढेर १०.३० रुपैयाँ पुगेको छ । त्यस्तै यस अवधिमा कम्पनीको मूल्य आम्दानी अनुपात ४७.४० गुणा रहेको छ भने प्रतिशेयर नेटवर्थ ११४.६२ रुपैयाँ रहेको छ।

असार मसान्तसम्म ७६ करोड रुपैयाँ चुक्ता पूँजी रहेको यस कम्पनीको रिटेन्ड अर्निङमा ११ करोड ११ लाख रुपैयाँ सञ्चित छ ।