इम्पेरिमेन्ट चार्ज घट्दा राष्ट्रिय वाणिज्य बैंकको नाफा ६० प्रतिशतले बढ्यो, कमायो साढे चार अर्ब   

काठमाडौं : राष्ट्रिय वाणिज्य बैंक लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ । उक्त वित्तीय विवरण अनुसार बैंकले यस अवधिमा चार अर्ब ५५ करोड ६८ लाख ९१ हजार रुपैयाँ खुद नाफा कमाएको छ।

सो नाफा अघिल्लो आर्थिक वर्षको सोही अवधिको तुलनामा ६०.६८ प्रतिशतले बढी हो। अघिल्लो आर्थिक वर्षको सोही अवधिसम्ममा बैंकले दुई अर्ब ८३ करोड ६० लाख दुई हजार रुपैयाँ खुद नाफा कमाएको थियो। 

समिक्षा अवधिमा बैंकको खुद ब्याज आम्दानी र सञ्चालन मुनाफा बढेसँगै खुद नाफा बढेको हो। असार मसान्तसम्म आइपुग्दा अवधिमा बैंकको खुद ब्याज आम्दानी १७.८५ प्रतिशतले बढेर ११ अर्ब ९६ करोड ६१ लाख रुपैयाँ पुगेको छ । 

त्यस्तै, बैंकको खुद फि तथा कमिशन आम्दानी ८.३४ प्रतिशत बढेको छ भने कुल सञ्चालन आम्दानी १४.१९ प्रतिशत बढेको छ। बैंकको सञ्चालन मुनाफा भने ६४.२६ प्रतिशतले बढेको छ।

प्रकाशित वित्तीय विवरण अनुसार यस अवधिमा बैंकको कुल वितरणयोग्य मुनाफा एक अर्ब सात करोड ६९ लाख ५७ हजार रुपैयाँ रहेको छ भने वितरणयोग्य प्रतिशेयर आम्दानी ६.८९ रुपैयाँ रहेको छ।

यस अवधिमा आइपुग्दा बैंकको खराब कर्जा घटेको छ । गत वर्ष ३.७९ प्रतिशत रहेको बैंकको खराब कर्जा बढेर ३.९५ प्रतिशतमा झरेको छ। गत वर्ष दुई अर्ब २३ करोड ४४ लाख रुपैयाँ बैंकको इम्पेरिमेन्ट चार्ज घटेर ८४ करोड ७९ लाख रुपैयाँमा झरेको छ । जसका कारण बैंकको खुद नाफामा बढेको हो । 

गत वर्षको चौथो त्रैमाससम्म आइपुग्दा नाफा बढेपनि बैंकको प्रतिशेयर आम्दानी पनि बढेको छ। यस अवधिमा बैंकको इपीएस ११ रुपैयाँ बढेर २९.१४ रुपैयाँ पुगेको छ।  

असार मसान्तसम्म १५ अर्ब ६३ करोड ७३ लाख रुपैयाँ चुक्ता पूँजी रहेको बैंकको जगेडा कोषमा ४० अर्ब ४५ करोड रुपैयाँ सञ्चित छ।