साउनमा पौने दुई खर्बको आयात हुँदा ६१ प्रतिशतले बढ्यो निर्यात, व्यापार घाटा साढे एक खर्ब  

काठमाडौं : चालु आर्थिक वर्ष २०८३/८४ को पहिलो साउन महिनामा नेपालले पौने दुई खर्ब रुपैयाँको वस्तु तथा सेवा आयात गरेको छ । भन्सार विभागको तथ्यांक अनुसार साउन मसान्तसम्म नेपालले एक खर्ब ८७ अर्ब ४४ करोड ३६ लाख रुपैयाँ बराबरको वस्तु तथा सेवा आयात गरेको हो ।

गत वर्षको तुलनामा आयात ३१.०४ प्रतिशतले बढेको छ । गत वर्षको सोही अवधिमा नेपालले एक खर्ब ४३ अर्ब ४ करोड ६ लाख रुपैयाँको वस्तु तथा सेवा आयात गरेको थियो । 

यस अवधिमा नेपालले ३८ खर्ब ७७ करोड ४१ लाख ४६ हजार रुपैयाँको वस्तु निर्यात गरेको छ । गत वर्षको निर्यात व्यापार ६१.७२ प्रतिशतले बढेको हो । गत वर्षको सोही अवधिमा नेपालले २३ अर्ब ९३ करोड २४ लाख ४१ हजार रुपैयाँको वस्तु निर्यात गरेको थियो । 

चालु आवको पहिलो महिनामा सवा दुई खर्बको वैदेशिक व्यापारमा नेपालले एक खर्ब ४८ अर्ब ७३ करोड ९४ लाख रुपैयाँ बराबरको व्यापार घाटा व्यहोरेको छ । गत वर्षको तुलनामा व्यापार घाटा २४.८८ प्रतिशतले बढेको छ । गत वर्ष नेपालले एक खर्ब १९ अर्ब १० करोड ८२ लाख रुपैयाँ बराबरको व्यापार घाटा व्यहोरेको थियो ।

यस अवधिमा नेपालको वैदेशिक व्यापार ३५.४४ प्रतिशतले बढेको छ । साउन मसातसम्म नेपालले दुई खर्ब २६ अर्ब १४ करोड ७७ लाख रुपैयाँ बराबरको वैदेशिक व्यापार गरेको छ । जबकी गत वर्ष मुलुकले एक खर्ब ६६ अर्ब ९७ करोड ३१ लाख रुपैयाँ बराबरको वैदेशिक व्यापार गरेको थियो ।  

यस अवधिमा नेपालले १०७ देशसँगको वैदेशिक व्यापार गरेको छ । जसमध्ये २० देशसँगको व्यापार नाफामा छ भने ८७ देशसँगको व्यापार घाटामा रहेको छ ।