होटल सारथीले १५ प्रतिशत लाभांश दिने, असोज ४ गते बोलायो साधारणसभा 

काठमाडौं : होटल सारथी लिमिटेडले असोज ४ गते दोस्रो वार्षिक साधारणसभा बोलाएको छ । कम्पनीको साउन ३१ गते बसेको सञ्चालक समितिको बैठकले लाभांश वितरण गर्ने प्रस्तावसहित साधारणसभा गर्ने निर्णय गरेको हो । 

उक्त सभा होटल सारथीको सभाहल धुलिखेलमा दिउँसो १२ बजे शुरु हुने छ । सभाले गत आर्थिक वर्षको वार्षिक प्रतिवेदनमाथि छलफल गर्ने, लेखापरीक्षक प्रतिवेदनसहित वित्तीय विवरणमा छलफल गर्ने र चालु आर्थिक वर्षका लागि बाह्य लेखापरीक्षक नियुक्त गरी निजको पारिश्रमिक निर्धारण गर्ने लगायतका प्रस्ताव पारित गर्ने छ । 

यसका साथै सभाले गत आवको मुनाफाबाट हाल कायम चुक्ता पुँजीको १३ प्रतिशत बोनस शेयर र सोको कर प्रयोजनका लागि २.७८९४ प्रतिशत नगद लाभांश वितरण गर्ने प्रस्ताव पारित गर्नेछ । साथै सभाले जारी पुँजीको ३० प्रतिशत साधारण शेयर जारी गर्ने प्रस्ताव पनि पारित गर्नेछ ।