तीजको खुसी थाती राख्दै भोटेकोशी बाढीपीडितलाई निसर्ग हस्पिटलको ११ लाख सहयोग

धनगढी : भोटेकोशी बाढीपीडितको राहत तथा पुनःस्थापनाका लागि निसर्ग हस्पिटलले ११ लाख ११ हजार १ सय ११ रुपैयाँ सहयोग गरेको छ। बाढीबाट ठूलो जनधनको क्षति भई कैयौँ परिवार पीडामा रहेका बेला हस्पिटलले आफ्नो वार्षिक तीज कार्यक्रमसमेत नगर्ने निर्णय गर्दै त्यसका लागि छुट्याइएको रकम राहत तथा पुनःस्थापनाका लागि सहयोग गरेको हो।

निसर्ग हस्पिटलका कर्मचारी, स्टाफ नर्स, चिकित्सक तथा शेयर सदस्यहरूले कम्तीमा एक दिन बराबरको तलब तथा सुविधा सहयोग गर्ने निर्णय गरेका थिए। तीज कार्यक्रमका लागि छुट्याइएको रकमसमेत जोडेर कुल ११ लाख ११ हजार १ सय ११ रुपैयाँ बाढीपीडितका लागि सहयोग गरिएको हस्पिटलले जनाएको छ।

हस्पिटलले हरेक वर्ष आफ्ना महिला कर्मचारी तथा चिकित्सकका लागि तीज कार्यक्रम आयोजना गर्दै आएको थियो। तर यस वर्ष भोटेकोशीमा आएको विनाशकारी बाढीले ठूलो जनधनको क्षति पु¥याएपछि तीज कार्यक्रम नगरी त्यसका लागि छुट्याइएको रकम पीडितको राहत तथा पुनःस्थापनामा लगाउने निर्णय गरिएको हो।

हस्पिटलका अध्यक्ष तीर्थराज पन्तले विपत्तिको समयमा आफ्नो खुसीभन्दा पीडित परिवारको आवश्यकता महत्वपूर्ण हुने बताए।

‘चाडपर्व हाम्रो खुसीका अवसर हुन्। तर अहिले धेरै परिवार दुःख र अभावमा छन्। यस्तो अवस्थामा आफ्नो खुसीको एउटा हिस्सा पीडितका लागि समर्पण गर्नु हाम्रो मानवीय दायित्व हो,’ अध्यक्ष पन्तले भने।

उनका अनुसार तीज कार्यक्रम नगर्ने निर्णय केवल एउटा कार्यक्रम स्थगित गर्नु नभई विपत्तिमा परेका नागरिकप्रति ऐक्यबद्धता जनाउने प्रयास हो।

‘हामीले गरेको सहयोगले बाढीले पु¥याएको सम्पूर्ण क्षतिको पूर्ति गर्न नसक्ला। तर पीडामा रहेका परिवारलाई हामी उनीहरूको साथमा छौँ भन्ने भरोसा दिन सक्छौँ,’ पन्तले भने।

हस्पिटलका कर्मचारी, स्टाफ नर्स, चिकित्सक तथा संस्थाको तर्फबाट संकलित उक्त रकम नेपाल सरकारको ‘प्रधानमन्त्री दैवी प्रकोप उद्धार कोष’ अन्तर्गत ग्लोबल आइएमई बैंकमा रहेको आधिकारिक बैंक खाता नम्बर ८८००४०१०१०००००५७८८ मा जम्मा गरिएको हस्पिटलले जनाएको छ।

चाडपर्वको खुसीलाई केही समयका लागि थाती राख्दै विपत्तिमा परेका परिवारको साथमा उभिनु आफ्नो सामाजिक उत्तरदायित्व भएको हस्पिटलको भनाइ छ।

निसर्ग हस्पिटलले सामाजिक उत्तरदायित्वअन्तर्गत विभिन्न मानवीय तथा सामाजिक सहयोगका कार्यक्रम सञ्चालन गर्दै आएको छ। स्वास्थ्य सेवा प्रदान गर्ने कार्यमा मात्र सीमित नरही विपत्तिको समयमा सहयोग, सामाजिक अभियानमा सहभागिता तथा समुदायको आवश्यकताअनुसार विभिन्न सहयोगका कार्यक्रमलाई निरन्तरता दिँदै आएको हस्पिटलले जनाएको छ।