झण्डै २५ प्रतिशत नाफा बढाएका बैंकका शेयरधनीहरुले कति गरे आम्दानी? (सूचीसहित) 

काठमाडौं : हाल सञ्चालनमा रहेका २० वाणिज्य बैंकले गत आर्थिक वर्षको चौथो अर्थात अन्तिम त्रैमाससम्मको अपरिस्कृत वित्तीय विवरण सार्वजनिक गरेका छन् । उक्त वित्तीय विवरण अनुसार यस अवधिमा बैंकहरुले ७० अर्ब १७ करोड ५९ लाख रुपैयाँ बराबरको नाफा कमाएका छन् ।

उक्त नाफा अघिल्लो आवको तुलनामा २४.९२ प्रतिशतले बढी हो । आव २०७८/७९ मा बैंकहरुले ५६ अर्ब १७ करोड २३ लाख रुपैयाँ नाफा कमाएका थिए । यस असार मसान्तसम्म आइपुग्दा अधिकांश बैंकहरुको नाफा बढेको छ । सर्वाधिक नाफा कमाउनेमा नबिल बैंक रहेको छ । चौथो त्रैमाससम्म आइपुग्दा दुई बैंकको नाफा भने घटेको छ ।

वित्तीय विवरण सार्वजनिक गरेसँगै बैंकहरुको नाफा बढ्दा शेयरधनीहरुले कति पाउँछन् भन्ने कुरा सबैको चासोमा पर्छ । यस अवधिमा छ बैंकको प्रतिशेयर आम्दानी घटेको छ भने  १४ बैंकको प्रतिशेयर आम्दानी बढेको छ । तर, अधिकांश बैंकको नाफा र प्रतिशेयर आम्दानी बढे विवरण प्रकाशित भएको दिन नै शेयर बजारमा उच्च अंकको गिरावट आएको छ ।

करपछिको नाफालाई कुल शेयर संख्याले भाग गर्दा आउने प्रतिफललाई नै प्रतिशेयर आम्दानी भनिन्छ । यसले कम्पनीको मुनाफा आर्जनको क्षमता देखाउने हुँदा कम्पनीको आधारभूत पक्षको विश्लेषणको प्रमुख सूचकको रुपमा लिइन्छ । यद्यपि, प्रतिशेयर आम्दानीले दोस्रो बजारको शेयरमा भने प्रभावित गरेको देखिँदैन । 

रिपोर्ट राम्रो आएर बजार बढ्दैन, बजार बढ्न पैसा चाहिन्छ

बैंकको रिपोर्ट राम्रो आएर मात्रै शेयर बजार बढ्न नसक्ने शेयर लगानीकर्ता केशव कोइराला बताउँछन् । उनी भन्छन्, ‘रिपोर्ट राम्रो आएर बजार बढ्ने भनेको एकरदुईदिन मात्र हो । बजार मजबुत भएर लामो समय बढ्नका लागि पैसा चाहिन्छ  । अहिले २२ सय बिन्दु भन्दा माथि बजार जान पैसा छैन । अलिकति बजार माथि जान सक्ने थियो तर प्रमोटरहरुलाई हामीले नै पैसा जिम्मा दिएर पठायौं । इन्स्योरेन्सका प्रमोटहरुले करोडौं कित्ता शेयर बेचे । शिवम्का प्रमोटरले पैसा लगे । यसले गर्दा पनि बजार २२ सय माथि जान सकेन ।’

उनका अनुसार १८ सय बिन्दु भन्दामाथि बजार जान नसकेपछि कम मूल्यमा शेयर किनेकाहरुले नाफा बुक गरे । ‘२२ सय बिन्दुमा शेयर किनेकोले पनि घाटा बुक गरे । बढ्न नसकेपछि बजार घट्ने नै हो’, उनले भने ।

अब बजार तल झर्छ भन्ने आंकलन गरेर नै लगानीकर्ताले शेयर बेचेको उनको भनाई छ । उनी भन्छन्, ‘बैंकको रिपोर्ट राम्रो आउँछ भनेर मान्छेहरु पर्खिरहेका थिए । बीचमा बैंकको शेयर झण्डै ३० प्रतिशतले बढेको थियो । रिपोर्ट राम्रो आएको दिन शेयर बेच्छु भनेर पर्खेकाहरुले शेयर बेचे । यसले गर्दा पनि बजार घट्न गएको हो ।’

औसतमा बैंकको रिपोर्ट राम्रोे आए बैंकको रिपोर्ट धेरै राम्रो भने नआएको उनको भनाई छ ।  ‘बैंकको रिपोर्ट जस्तो आएपनि मान्छे शेयर बेच्न थाले । सबै बेच्ने भएपछि किन्ने कसले? यसले गर्दा पनि बजार झरेको हो’, उनले थपे । 

दुई हजारको आसपासमा आएर बजार एकपटक फेरी बढ्ने उनी बताउँछन् । रिपोर्टले मात्रै बजार बढ्ने अवस्था थिएन । बैंकको रिपोर्ट यत्तिको आँउछ भनेर नै केही समय अगाडी बजार बढेको उनको भनाई छ ।

अर्का शेयर विश्लेषक मुक्ति अर्याल बैंकको रिपोर्ट अनुसार बजार घट्नुपर्ने अवस्था नरहेको बताउँछन् । उनी भन्छन, ‘बैंकहरुको रिपोर्ट त राम्रै आएको थियो । बजार घट्नु पर्ने अवस्था त थिएन । कारोबारको शुरुवातमा केही बैंकहरुको शेयर राम्रोसँग बढीरहेको थियो । बजार घट्नुमा मौद्रिक नीतिमा राष्ट्र बैंकले लिएको नीतिको प्रभाव पनि हुन सक्छ ।’

छ बैंकको प्रतिशेयर आम्दानी घट्यो 

यस अवधिमा प्रभु बैंकको प्रतिशेयर आम्दानी २ रुपैयाँ ९७ पैसा, नेपाल इन्भेष्टमेन्ट मेगा बैंकको ४ रुपैयाँ ६७ पैसा, कुमारी बैंकको १० रुपैयाँ ७ पैसा, राष्ट्रिय वाणिज्य बैंकको ८९ पैसा, हिमालयन बैंकको ३ रुपैयाँ १७ पैसा र लक्ष्मी सनराइज बैंकको प्रतिशेयर आम्दानी २ रुपैयाँ ६६ पैसाले घटेको छ ।

वाणिज्य बैकहरुको प्रतिशेयर आम्दानी (रुपैयाँमा)