इभि गाडीको आयात तीन गुणाले बढ्यो, एक वर्षमा भित्रिए ११ हजार ७०० गाडी 

काठमाडौं : गत आर्थिक वर्ष २०८०/८१ मा  विद्युतीय गाडीको आयात ह्वात्तै बढेको छ । भन्सार विभागको तथ्यांक अनुसार एक वर्षमा ११ हजार ७०० वटा विद्युतीय गाडी (जीप, कार र भ्यान) आयात भएको छ । यो संख्या हालसम्मकै उच्च हो ।

यस अवधिमा अघिल्लो वर्षको सोही अवधिको तुलनामा करिब तीन गुणा बढी आयात भएको छ । आव २०७९/८० मा ४ हजार ५० वटा इभी गाडी नेपाल भित्रिएका थिए । 

त्यसो त सरकारले बजेट मार्फत इभी गाडीमा कर बढाउने पूर्व सूचनाको आधारमा व्यापारीहरुले बजेट अघि नै ३ हजार बढी गाडी आयात भएको थियो । विद्युतीय गाडीको आयात बढ्दा व्यापार घाटा चुलिएकाे छ भने र राजस्वमा सङ्कुचन  आएकाे छ ।  

विभागका अनुसार यस अवधिमा इभी गाडीको आयात गर्दा २९ अर्ब ४७ करोड ४३ हजार रकम रुपैयाँ बाहिरिएको छ भने आयातित गाडीबाट १३ अर्ब २६ करोड ७ लाख ३३ हजार रुपैयाँ राजस्व संकलन भएको छ । पेट्रोलियम गाडी आयात हुँदा सरकारलाई तीन गुणासम्म राजस्व उठ्ने थियो ।

तर, सरकारले विद्युतीय गाडीको प्रोत्साहनका लागि भन्दै भन्सार तथा अन्तःशुल्कमा २०० प्रतिशतसम्म छुट दिएको छ । जसका कारण अटोमाेबाइल बजार ईभी  (विद्युतीय) सवारीतर्फ आकर्षित हुँदा राजस्वको ठुलो हिस्सा गुम्न पुगेको छ ।

विभागका अनुसार नेपालले असारमा मात्रै २३४ वटा गाडी आयात भएको छ । त्यस्तै साउनमा ११० वटा गाडी आयात गरेको थियो भने भदौमा ७८८ वटा र असोजमा १२ सय ३७ वटा इभि गाडी आयात भएको थियो । 

विभागको तथ्यांक अनुसार गत वर्षको कार्तिकमा ६५२ वटा, मंसिरमा ८९९ वटा, पुसमा १४ सय १२ वटा, माघमा १ हजार ५२ वटा, फागुनमा २७६ वटा, चैतमा ६५८ वटा बैशाखमा एक हजार ४०४ वटा र जेठमा ३ हजार १९९ विद्युतीय गाडी आयात भएको थियो ।

यस अवधिमा नेपालले सबैभन्दा बढी विद्युतीय गाडी चीनबाट आयात गरेको छ । विभागका अनुसार असार मसान्तसम्म चीनबाट मात्रै २२ अर्ब १२ करोड १४ लाख ५९ हजार रुपैयाँ बराबरको आठ हजार ६५ वटा इभि गाडी आयात गरेको हो । 

त्यसैगरी भारतबाट ६ अर्ब ६१ करोड ७५ लाख ५ हजार रुपैयाँ बराबरको तीन हजार ३७७ वटा, कोरियाबाट ४७ करोड ६९ लाख ४९ हजार रुपैयाँ बराबरको ८२ वटा, इन्डोनेशियाबाट २९ करोड ९ लाख ६० हजार रुपैयाँको १५० वटा गाडी आयात भएको छ । 

त्यस्तै यस अवधिमा जर्मनबाट १४ करोड ६५ लाख ५ हजार रुपैयाँ बराबरको २३ वटा र अमेरिकाबाट एक करोड ६६ लाख ६६ हजार रुपैयाँ बराबरको ३ वटा इभि गाडी आयात गरेको विभागको तथ्यांकमा उल्लेख छ । 

असार मसान्तस्म्म नेपालले अवधिमा ८ अर्ब ६० करोड २० लाख ९ हजार रुपैयाँ खर्चेर ५० किलोवाटसम्मको ४ हजार ५७१ वटा गाडी आयात गरेको छ भने १९ अर्ब ६७ करोड २ लाख ८० हजार रुपैयाँ खर्चेर ५१ किलोवाटदेखि १०० किलोवाटसम्मको ६ हजार ८८५ वटा विद्युतीय सवारी साधन आयात गरेको छ । 

त्यसैगरी यस अवधिमा एक अर्ब १७ लाख ७१ हजार रुपैयाँ खर्चेर १०१ किलोवाटदेखि २०० किलोवाटसम्मको २१७ वटा र १९ करोड ५९ लाख ८४ हजार रुपैयाँ खर्चेर २०१ किलोवाटदेखि ३०० किलोवाटसम्मको २७ वटा विद्युतीय सवारी साधन आयात गरेको छ ।