Below Menu

सार्वजनिक ऋण २५ खर्ब नाघ्यो, तीन महिनामा थपियो करिब ८९ अर्ब 

सार्वजनिक ऋण २५ खर्ब नाघ्यो, तीन महिनामा थपियो करिब ८९ अर्ब 

काठमाडौं : चालु आर्थिक वर्ष २०८१/८२ को पहिलो तीन महिनामा ८८ अर्ब ९३ करोड सरकारी ऋण थपिएको छ । 

Sponsored Advertisement

सार्वजनिक ऋण व्यवस्थापन कार्यालयका अनुसार चालु आर्थिक वर्ष सुरु हुँदा २४ खर्ब ३४ अर्ब नौ करोड रहेको सार्वजनिक ऋण असोज मसान्तसम्म बढेर २५ खर्ब ३४ अर्ब नौं करोड बराबर पुगेको छ । हालसम्मको कूल सार्वजनिक ऋण मुलुकको कूल गार्हस्थ्य उत्पादन (जिडिपी) को ४४ दशमलव २३ प्रतिशत बराबर हो ।

चालु आर्थिक वर्ष सुरु हुँदा आन्तरिक ऋण ११ खर्ब ८० अर्ब ९० करोड बराबर रहेकामा असोज मसान्तसम्ममा बढेर १२ खर्ब ३६ अर्ब ३० करोड पुगेको छ । जिडिपीका आधारमा आन्तरिक ऋणको अनुपात २१ दशमलव ६७ प्रतिशत बराबर हो । यो तीन महिनामा सरकारले एक खर्ब १५ अर्ब आन्तरिक ऋण उठाउँदा ५९ अर्ब ६० करोड बराबर ऋण तिरेको छ ।

त्यस्तै, असोज मसान्तसम्म तिर्न बाँकी बाह्य ऋण १२ खर्ब ८६ अर्ब ७३ करोड छ । चालु आवको सुरुआतमा बाह्य ऋण १२ खर्ब ५३ अर्ब १९ करोड बराबर थियो ।

पछिल्लो तीन महिनामा सरकारले बाह्य ऋणको साँवा र ब्याज भुक्तानीमा २१ अर्ब ३१ करोड खर्च गरेको छ भने यहि अवधिमा नौं अर्ब ४३ करोड बराबर बाह्य ऋण थपेको छ । जिडिपीको तुलनामा बाह्य ऋण २२ दशमलव ५६ प्रतिशत बराबर हो ।

चालु आर्थिक वर्षका लागि सरकारले पाँच खर्ब ४७ अर्ब रुपैयाँ सार्वजनिक ऋण उठाउने लक्ष्य लिएकामा असोज मसान्तसम्ममा एक खर्ब ३६ अर्ब ३१ करोड ऋण उठाइसकेको छ । वार्षिक लक्ष्यको तुलनामा यो अवधिको सार्वजनिक ऋण प्राप्ति २४ दशमलव ९२ प्रतिशत बराबर हो ।

चालु आर्थिक वर्षका लागि सरकारले सार्वजनिक ऋणको साँवा र ब्याज भुक्तानी गर्ने प्रयोजनका लागि कुल चार खर्ब दुई अर्ब बजेट छुट्याएको छ । असोज मसान्तसम्ममा ८३ अर्ब सात करोड ८१ लाख बराबर साँवा ब्याज भुक्तानी भइसकेको छ ।

यो अवधिको साँवा ब्याज भुक्तानी वार्षिक बजेट विनियोजनका आधारमा २० दशमलव ६२ प्रतिशत बराबर हो । जिडिपीको आधारमा असोज मसान्तसम्मको कुल ऋण सेवा खर्च एक दशमलव ४६ प्रतिशत बराबर हो ।

थप समाचार