सूर्यज्योति लाइफको नाफा साढे ११ करोड, जीवन बीमा कोषको आकार २२ प्रतिशतले बढ्यो 

काठमाडौं : सूर्यज्योति लाइफ इन्स्योरेन्सले लिमिटेडले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण प्रकाशित गरेको छ । उक्त विवरण अनुसार इन्स्योरेन्सले ११ करोड ५३ लाख रुपैयाँ खुद नाफा कमाएको छ ।

उक्त नाफा गत वर्षको सोही अवधिको तुलनामा २.५१ प्रतिशतले बढी हो । गत आवको सोही अवधिमा कम्पनीले ११ करोड २५ लाख रुपैयाँ नाफा कमाएको थियो ।

असोज मसान्तसम्म आइपुग्दा कम्पनीको खुद बीमाशुल्क बढेसँगै कर्जा तथा लगानीबाट हुने आम्दानी बढ्दा नाफा बढेको हो ।
यस अवधिमा कम्पनीको लगानी तथा कर्जाबाट हुने आम्दानी २७.०८ प्रतिशतले बढेर ९४ करोड एक लाख रुपैयाँ पुगेको छ । गत वर्षको सोही अवधिमा कम्पनीले लगानी तथा कर्जाबाट ७३ करोड ९७ लाख रुपैयाँ आम्दानी गरेको थियो । 

साथै यस अवधिमा कम्पनीले दुई अर्ब ४५ करोड ८७ लाख रुपैयाँ खुद बीमाशुल्क आर्जन गरेको छ । बीमाशुल्क गत वर्षको तुलनामा १०.०६ प्रतिशतले बढी हो । गत वर्ष इन्स्योरेन्सले दुई अर्ब २३ करोड ३९ लाख रुपैयाँ खुद बीमाशुल्क आर्जन गरेको थियो । 

असोज मसान्तसम्म आइपुग्दा नाफा बढेपनि इन्स्योरेन्सको प्रतिशेयर आम्दानी भने घटेको छ । यस अवधिमा इन्स्योरेन्सको इपीएस घटेर ९.२० रुपैयाँ पुगेको छ  । त्यस्तै कम्पनीको प्रतिशेयर नेटवर्थ १४३.५९ रुपैयाँ रहेको छ भने मूल्य आम्दानी अनुपात ५४.७५ गुणा रहेको छ ।

यस अवधिमा कम्पनीको जीवन बीमा कोषमा ३६ अर्ब ४ करोड ८९ लाख रुपौयाँ रहेको छ । गत वर्षको सोही अवधिको तुलनामा कम्पनीको जीवन बीमा कोषको आकार २२.२८ प्रतिशतले रहेको छ । गत वर्ष यस्तो रकम २९ अर्ब ४८७ करोड ९४ लाख रुपैयाँ रहेको थियो ।

असोज मसान्तसम्म पाँच अर्ब एक करोड १९ लाख रुपैयाँ चुक्ता पूँजी रहेको इन्स्योरेन्सको महाविपत्ती कोषमा ३७ करोड ७९ लाख रुपैयाँ, रिटेन्ड अर्निङ्गमा एक अर्ब ३३ करोड २७ लाख र अन्य इक्विटीमा ४७ करोड ४० लाख रुपैयाँ सञ्चित छ ।