साढे ७३ करोड लगानी थप्दै स्वर्णिम होटल, नौ महिनामा गर्यो १५ करोडको व्यापार 

काठमाडौं : स्वर्णिम होटल लिमिटेडले चालु आर्थिक वर्षको पहिलो नौ महिनामा १५ करोड रुपैयाँ बराबरको व्यापार गरेको छ ।

उक्त रकम गत वर्षको सोही अवधिको तुलनामा १४.७७ प्रतिशतले घटेको हो । आर्थिक वर्ष २०२५ को नौ महिनामा कम्पनीले १७ करोड ६० लाख रुपैयाँ बराबरको व्यापार गरेको थियो ।  

कम्पनीले सन् २०२५ मा २३ करोड २० लाख रुपैयाँ र सन् २०२४ मा ८ करोड २० लाख रुपैयाँ आम्दानी गरेको थियो ।  

चालु आवको नौ महिनामा कम्पनीको सञ्चालन नाफा मार्जिन (ईबीआईटिडिए) १९.६७ प्रतिशत अर्थात २ करोड ९० लाख रुपैयाँ रहेको छ । तर, उच्च ब्याज खर्चका कारण कम्पनीको खुद नाफा भने अझै नकारात्मक अवस्थामा रहेको छ ।

होटलको अकुपेन्सी दरमा पनि सुधार देखिएको छ । सन् २०२४ मा करिब ३६ प्रतिशत रहेको अकुपेन्सी सन् २०२५ मा बढेर ६९ प्रतिशत पुगेको थियो भने चालु आवको दश महिनामा ६५ प्रतिशत रहेको छ ।  

सन् २०१२ मा स्वर्णिम बुटिक होटल प्रालिका रूपमा स्थापना भएको कम्पनी २०२४ मा पब्लिक कम्पनीमा परिणत भएको हो । कम्पनीमा नरेश लाल श्रेष्ठको ३८ प्रतिशत स्वामित्व रहेको छ भने नेपाल लाइफ इन्स्योरेन्स कम्पनीको २०.५२ प्रतिशत शेयर हिस्सा रहेको छ ।  

सन् २०२३ को डिसेम्बरदेखि पूर्ण रूपमा सञ्चालनमा आएको होटलमा १०० वटा कोठाहरु रहेका छन् । जसमा ९९ डिलक्स र १ स्विट कोठा रहेका छन्। 

कम्पनीले होटल विस्तारका लागि ७३ करोड ५० लाख रुपैयाँ बराबरको लगानी योजना अघि बढाएको छ । विस्तारका लागि कम्पनीले ३८ करोड रुपैयाँ बराबरको ३८ लाख कित्ता प्राथमिक शेयर (आईपीओ) निष्कासन गर्ने तयारी गरेको छ ।   

नक्सालस्थित ‘होलिडे इन एक्स्प्रेस’ सञ्चालन गर्दै आएको स्वर्णिम होटलको चुक्ता पुँजी एक अर्ब ५२ करोड रुपैयाँ रहेको छ । कम्पनीले होटल सञ्चालनका लागि इन्टरकन्टिनेन्टल होटल्स ग्रुपसँग सम्झौता गरेको छ ।