विपद्का कारण मुख्य राजमार्ग अवरुद्ध, बेनी-जोमसोम सडकखण्ड एकतर्फी सञ्चालनमा

काठमाडौं : बाढी तथा पहिरोजस्ता प्राकृतिक विपद्का कारण देशका विभिन्न मुख्य सडकखण्डहरू अवरुद्ध भएका छन् । नेपाल प्रहरीले सार्वजनिक गरेको विवरणअनुसार गोरखा र अर्घाखाँचीका सडकखण्ड पूर्ण रूपमा अवरुद्ध भएका छन् भने म्याग्दीको एक सडकखण्ड एकतर्फी रूपमा सञ्चालनमा आएको छ ।  

Sponsored Advertisement

नेपाल प्रहरीका अनुसार अर्घाखाँचीको सन्धिखर्क नगरपालिका-३ मा पहिरो खस्दा गोरुसिंगे–सन्धिखर्क सडकखण्ड पूर्ण रूपमा अवरुद्ध भएको छ । आज राति २ बजेदेखि सडक अवरुद्ध हुँदा त्यस क्षेत्रमा सवारी आवागमन ठप्प बनेको छ ।

यस्तै, गण्डकी प्रदेशअन्तर्गत गोरखाको आरुघाट गाउँपालिका-२ र ३ तथा नयाँपुलस्थित सोतीमा रहेको फलामे पुल र आरुघाटबाट धादिङ जोड्ने सडकखण्ड बाढीका कारण पूर्ण रूपमा अवरुद्ध भएको छ । असोज २५ गते बिहानदेखि आएको बाढीले उक्त खण्डमा यातायात सेवा रोकिएको प्रहरीले जनाएको छ । 

उता म्याग्दीको रघुगंगा गाउँपालिका-२ बैसरीस्थित बेनी-जोमसोम सडकखण्ड भने एकतर्फी रूपमा सञ्चालनमा आएको छ । असोज १० गते बिहान पहिरोका कारण प्रभावित बनेको उक्त खण्डमा हाल सवारी साधनहरूलाई एकतर्फी रूपमा आवतजावत गराइएको छ । अवरुद्ध सडकहरू खुलाउन आवश्यक पहल भइरहेको प्रहरीले जनाएको छ ।