काठमाडौं :अख्तियार दुरुपयोग अनुसन्धान आयोगले भ्रष्टाचार आरोपमा दुईजना विरुद्ध मुद्दा दायर गरेको छ । आयोगले राहदानी विभाग त्रिपुरेश्वर, परिचय पत्र शाखामा तत्कालीन करारमा कार्यरत कम्प्युटर इन्जिनियर प्रदिप भट्टराईसमेत दुई जना विरुद्ध मुद्दा दायर गरेको हो ।
राष्ट्रिय परिचय पत्र तथा पञ्जिकरण विभागबाट राष्ट्रिय परिचय पत्र सहजीकरणको लागि विभागमा खटाइएका कम्प्युटर इन्जिनियर भट्टराईले राहदानी बनाइदिने भनी सेवाग्राहीहरुसँग ३४ हजार रुपैयाँ घुस लिएको पुष्टि भएको आयोगको दाबी छ ।
प्रतिवादी सुमी धामी भन्ने सुमित्रा सापकोटाले सोही कार्यमा भट्टराईसँग मिलेमतो गरी घुस वापतको रकम भट्टराईको खातामा जम्मा गरेको समेत पाइएको आयोगको भनाई छ ।
उनीहरु विरुद्ध जनही ३४ हजार रुपैयाँ बिगो कायम गरी सजायको मागदाबी गर्दै आयोगले आइतबार बिशेष अदालत काठमाडौंमा आरोपपत्र दायर गरेको हो ।