नेप्सेको ‘बुलिस ट्रेन्ड’ बारे संसदमा बहसः १४५ अंकले घट्यो परिसूचक, कारोबारमा भने नयाँ कीर्तिमान

काठमाडौं : केही महिनायता बुलिस ट्रेन्डमा अघि बढेको शेयर बजारमा भारी गिरावट आएको छ । शेयर बजारको अस्वभाविक वृद्धिलाई लिएर संसदमा बहस चल्न थाले पछि नेप्से परिसूचक आज उच्च अंकले घटेको छ ।

साताको तेस्रो कारोबार दिन मंगलबार नेपाल स्टक एक्सचेञ्ज नेप्से परिसूचक १४५.०५ अंकले घटेर २६५१.३२ बिन्दुमा पुगेको हो । सोमबार नेप्से ४०.७६ अंकले बढेर २७९६.३८ बिन्दुमा बन्द भएको थियो ।

आज कारोबारमा आएका ८ कम्पनीको शेयरमूल्य बढेको छ । भने २३३ कम्पनीको शेयरमूल्य घटेको छ । त्यस्तै आज एक कम्पनीको शेयरमूल्य स्थिर रहेको छ ।

शेयर बजार घटे पनि कारोबार रकममा भने नयाँ कीर्तिमानी देखिएको छ । आज बजारमा २३ अर्ब ७१ करोड ६७ लाख रुपैयाँ बराबरको कारोबार भएको छ । सोमबार नेप्सेमा २१ अर्ब ८६ करोड ४९ लाख रुपैयाँ बराबरको कारोबार भएको थियो ।

आज हिमालयन रि इन्स्योरेन्स कम्पनीको सर्वाधिक शेयर कारोबार भएको छ । यस कम्पनीको आज एक अर्ब ३९ करोड ७८ लाख रुपैयाँ बराबरको कारोबार भएको हो ।

सर्वाधिक मूल्य बढ्नेमा थ्री स्टार हाइड्रोपावर रहेको छ । आज यस कम्पनीको शेयरमूल्यमा सकारात्मक सर्किट लागेको हो । आज ६ वटा कम्पनीको शेयरमूल्यमा नकारात्मक सर्किट लागेको छ । 

सोमबार प्रतिनिधिसभाको बैठकमा पूर्वअर्थमन्त्री डा प्रकाशशरण महतले केही कम्पनीका शेयर मूल्य अस्वभाविकरुपमा बढेको देखिएकाले त्यस्ता कम्पनीको शेयर कारोबारमा बदमासी भएकोबारे नियामकले अनुसन्धान गर्नुपर्ने बताएका थिए । 

पुँजीबजारमा केहि व्यक्तिले ‘इन्साइडर ट्रेडिङ’ गरेको हुनसक्ने पूर्वअर्थमन्त्री महतले आशंका प्रकट गरेका थिए । “कुनै कम्पनीको भित्री सूचना प्राप्त गरेर त्यसको दुरुपयोग गर्ने र आम लगानीकर्तालाई फस्ने परिस्थिति निर्माण हुन सक्ने बताउँदै उनले केही त्यस्ता संस्थाको शेयर मूल्य बढेकोप्रति गम्भीर रुपमा हेर्न जरुरी रहेको बताएका थिए । 

त्यस्तै सांसद डा अमरेशकुमार सिंहले पनि केही लगानीकर्ताकर्ताले ‘इन्साइडर ट्रेडिङ’ गरेको र केही कम्पनीको शेयर मूल्यमा चलखेल भइरहेको बताएका थिए । लगानीकर्ता र धितोपत्र दलालले चलखेल गरिहेको उनको भनाइ थियो । अनलाईन र सामाजिक सञ्जालबाट लगानीकर्तालाई गलत सूचना दिई भित्री कारोबार भइरहेको उल्लेख गर्दै शेयर बजारमा ‘इन्साइडर ट्रेडिङ’ र ‘कर्नरिङ’ भएको विषयमा छानबिन समिति गठन गर्न समेत उनले माग गरेका थिए ।