पौने १० खर्बको आयात हुँदा ४६ प्रतिशतले बढ्यो निर्यात, व्यापार घाटा साढे आठ खर्ब 

काठमाडौं : नेपालको वैदेशिक व्यापार सामान्य सुधार देखिएको छ । चालु आर्थिक वर्षको माघ मसान्तसम्मको तथ्यांक अनुसार आयात र निर्यात दुवै बढेको पाइएको हो ।

भन्सार विभागको तथ्यांक अनुसार यस अवधिमा आयात १०.०९ प्रतिशत र निर्यात ४६.५० प्रतिशतले बढेको छ । सात महिनामा नेपालले साढे आठ खर्ब रुपैयाँ बराबरको व्यापार घाटा व्यहोरेको छ ।

विभागले सार्वजनिक गरेको तथ्यांक अनुसार यस अवधिमा मुलुकले आठ खर्ब ६१ अर्ब ३८ करोड २८ लाख रुपैयाँ बराबरको व्यापार घाटा व्यहोरेको हो ।

गत वर्षको तुलनामा व्यापार घाटा ६.२० प्रतिशतले बढेको छ । गत आवको सोही अवधिमा नेपालले आठ खर्ब ११ अर्ब ११ करोड २९ लाख रुपैयाँ बराबरको व्यापार घाटा व्यहोरेको थियो ।

माघ मसातसम्म नेपालले ११ खर्ब १५ अर्ब ७९ करोड २५ लाख रुपैयाँ बराबरको वैदेशिक व्यापार गरेको छ । जबकी गत आवको सोही अवधिमा ९ खर्ब ८४ अर्ब ७७ करोड ४८ लाख रुपैयाँ बराबरको वैदेशिक व्यापार गरेको थियो ।

मुलुकले माघ मसान्तसम्म १५९ देशसँग वैदेशिक व्यापार गरेको छ । जसमा १२७ देशसँगको व्यापार घाटामा रहेको छ भने ३२ देशसँगको व्यापार नाफामा रहेको छ ।

नेपालले यस अवधिमा भारतसँग सबैभन्दा बढी व्यापारघाटा व्यहोरेको छ । यस अवधिमा भारतसँग ४ खर्ब ९८ अर्ब ३४ करोड ५० लाख रुपैयाँ बराबरको व्यापार घाटा व्यहोरेको हो ।

भारतबाट नेपालले यस अवधिमा ५ खर्ब ९६ अर्ब ३५ करोड २६ लाख रुपैयाँ बरारको वस्तु तथा सेवा आयात गरेको छ भने ९८ अर्ब ७५ लाख रुपैयाँ बरारबरको सामान निर्यात गरेको छ ।

निर्यात ४६ प्रतिशतले बढ्यो

विभागका अनुसार यस अवधिमा आयात र निर्यात दुवैमा सुधार देखिएको । माघ मसान्तसम्म पौने १० खर्ब रुपैयाँ बराबरको वस्तु तथा सेवा आयात भएको भने साव एक खर्बको वस्तु तथा सेवा निर्यात भएको छ ।

विभागका अनुसार यस अवधिमा नौ खर्ब ८८ अर्ब ५८ करोड ७७ लाख रुपैयाँ बराबरको वस्तु आयात भएको हो । गत वर्षको सोही अवधिमा आठ खर्ब ९७ अर्ब ४३ करोड ३८ लाख रुपैयाँ बराबरको वस्तु आयात भएको थियो ।

यस अवधिमा एक खर्ब २७ अर्ब २० करोड ४८ लाख रुपैयाँ बराबरको वस्तु निर्यात भएको छ । गत वर्ष ८६ अर्ब ८३ करोड नौं लाख रुपैयाँ बराबरको वस्तु तथा सेवाको निर्यात भएको थियो ।