वीरगञ्जमा विजयश्री सुगर मिल्स सञ्चालनको अन्तिम चरणमा, चिनीसँगै १० मेगावाट बिजुली उत्पादन हुने

काठमाडौं : वीरगञ्जको सुख्खा बन्दरगाह नजिक निर्माणाधीन रहेको विजयश्री सुगर मिल्स प्रालि सञ्चालनको अन्तिम तयारीमा पुगेको छ । उद्योग आगामी छ महिनाभित्र उत्पादन सुरु गर्ने लक्ष्यसहित अघि बढिरहेको छ । 

सन् २०२४ बाट पूर्वाधार निर्माण सुरु गरिएको यो उद्योगको भौतिक प्रगति करिब ९० प्रतिशत भईसकेको छ । उद्योग पूर्ण रूपमा सञ्चालनमा आएपछि वार्षिक ३३ हजार ७५० मेट्रिक टन चिनी उत्पादन गर्ने लक्ष्य राखिएको छ । 

साथै, यसबाट १८ हजार ७५० मेट्रिक टन मोलासेस र १० मेगावाट विद्युत उत्पादन हुने योजना पनि छ । यसले  चिनी उत्पादनमा आत्मनिर्भरता बढाउनुका साथै ऊर्जा क्षेत्रलाई समेत योगदान पुर्याउने अपेक्षा गरिएको छ ।

सन् २०२२ मा स्थापना भएको यस कम्पनीको कम्पनीको नेतृत्व कविता अग्रवाल सम्हालिरहेकी छन् । कम्पनीमा उनको ४४ प्रतिशत शेयर हिस्सा रहेको छ । 

यसैबीच, इन्फोमेरिक्स क्रेडिट रेटिङ नेपालले कम्पनीलाई पहिलोपटक क्रेडिट रेटिङ प्रदान गरेको छ । करिब एक अर्ब १ करोड ५२ लाख रुपैयाँ बराबरको बैंकिङ सुविधा अन्तर्गत दीर्घकालीन ऋणका लागि “बीबी” र अल्पकालीनका लागि “एफोर” रेटिङ निर्धारण गरिएको हो । 

कम्पनीले दीर्घकालिन कर्जाका लागि ९३ करोड ४९ लाख र अल्पकालिन कर्जाका लागि आठ करोड तीन लाख रुपैयाँ बराबरको कर्जा रेटिङ गराएको छ । उद्योग वीरगञ्ज ड्राइपोर्टबाट करिब २५ किलोमिटर दूरीमा रहेको यो परियोजना करिब १,३५,४५२ वर्गमिटर क्षेत्रफलमा फैलिएको छ । 

नेपालमा चिनीको माग स्थिर रहेको छ । चिनी दैनिक उपभोगको अत्यावश्यक वस्तु मात्र नभई खाद्य उद्योगमा यसको बहुआयामिक प्रयोग हुन्छ । तर पछिल्लो समय सरकारी नीतिमा आएको परिवर्तनले उद्योगलाई केही चुनौती पनि थपेको छ । 

आयातित चिनिमा लाग्ने भन्सार शुल्क ३० प्रतिशतबाट घटाएर १५ प्रतिशतमा झारिएपछि विदेशी सस्तो चिनीसँग प्रतिस्पर्धा तीव्र बन्ने देखिएको छ । साथै, किसानलाई दिइने अनुदान घटाइँदा उखु उत्पादनमा असर पर्ने जोखिम पनि बढेको छ ।

अन्तर्राष्ट्रिय बजारमा चिनीको मूल्यमा हुने उतारचढाव, मौसम परिवर्तन, कीरा प्रकोप तथा उखु उत्पादनमा आउने कमी जस्ता कारकहरूले पनि उद्योगको सञ्चालनमा प्रभाव पार्न सक्छन् ।