सरकारी ऋण साढे २५ अर्बले घट्यो, पाँच महिनामा एक खर्ब ७० अर्ब भुक्तानी 

काठमाडौं : चालु आर्थिक वर्षको मंसिर मसान्तसम्म सार्वजनिक ऋणको आकार २४ खर्ब ९२ अर्ब ४१ करोड रुपैयाँ पुगेको छ । 
सार्वजनिक ऋण व्यवस्थापन कार्यालयका अनुसार चालु आव वर्ष सुरु हुँदा २४ खर्ब ३४ अर्ब नौ करोड रहेको सार्वजनिक ऋण मंसिर मसान्तसम्म बढेर ५८ अर्ब ३१ करोड थपिएको हो । 

हालसम्मको कूल सार्वजनिक ऋण मुलुकको कूल गार्हस्थ्य उत्पादन (जिडिपी) को ४३ दशमलव ६९ प्रतिशत बराबर हो । मंसिरमा ५८ अर्ब २४ करोड ऋण दायित्व भुक्तानी तथा २१ अर्ब २३ करोड मात्र ऋण प्राप्ति भएको र विनिमय दरमा भएको घटबढले कात्तिकको तुलनामा यस महिना २५ अर्ब ६४ करोड रुपैयाँ सार्वजनिक ऋण घटेको छ ।

मंसिर मसान्तसम्म सरकारले एक खर्ब ७० अर्ब ५९ करोड रुपैयाँ बराबरको सार्वजनिक ऋणको साँवा–ब्याजको भुक्तानी गरेको छ । जसमा साँवा वापत एक खर्ब ४४ अर्ब ५५ करोड रुपैयाँ र ब्या वापत २६ अर्ब तीन करोड रुपैयाँ बराबरको भुक्तानी गरेको हो ।

चालु आर्थिक वर्ष सुरु हुँदा आन्तरिक ऋण ११ खर्ब ८० अर्ब ९० करोड बराबर रहेकामा मंसिर मसान्तसम्ममा बढेर १२ खर्ब १७ अर्ब ६६ करोड पुगेको छ ।

जिडिपीका आधारमा आन्तरिक ऋणको अनुपात २१ दशमलव ३४ प्रतिशत बराबर हो । यस अवधिमा सरकारले एक खर्ब ६४ अर्ब आन्तरिक ऋण उठाउँदा एक खर्ब २७ अर्ब २४ करोड बराबर ऋण तिरेको छ ।

त्यस्तै, मंसिर मसान्तसम्म तिर्न बाँकी बाह्य ऋण १२ खर्ब ७४ अर्ब ७४ करोड रुपैयाँ छ । चालु आवको सुरुआतमा बाह्य ऋण १२ खर्ब ५३ अर्ब १९ करोड बराबर थियो ।

मंसिर मसान्तसम्म सरकारले बाह्य ऋणको साँवा र ब्याज भुक्तानीमा १७ अर्ब ३१ करोड खर्च गरेको छ भने यहि अवधिमा २८ अर्ब २९ करोड बराबर बाह्य ऋण थपेको छ । जिडिपीको तुलनामा बाह्य ऋण २२ दशमलव ३५ प्रतिशत बराबर हो ।

चालु आर्थिक वर्षका लागि सरकारले पाँच खर्ब ४७ अर्ब रुपैयाँ सार्वजनिक ऋण उठाउने लक्ष्य लिएकामा मंसिर मसान्तसम्ममा एक खर्ब ९२ अर्ब २९ करोड ऋण उठाइसकेको छ । वार्षिक लक्ष्यको तुलनामा यो अवधिको सार्वजनिक ऋण प्राप्ति ३५ दशमलव १५ प्रतिशत बराबर हो ।

चालु आर्थिक वर्षका लागि सरकारले सार्वजनिक ऋणको साँवा र ब्याज भुक्तानी गर्ने प्रयोजनका लागि कुल चार खर्ब दुई अर्ब बजेट छुट्याएको छ । मंसिर मसान्तसम्ममा एक खर्ब ७० अर्ब ५९ करोड बराबर साँवा ब्याज भुक्तानी भइसकेको छ ।

यो अवधिको साँवा ब्याज भुक्तानी वार्षिक बजेट विनियोजनका आधारमा ४२ दशमलव ३५ प्रतिशत बराबर हो । जिडिपीको आधारमा मंसिर मसान्तसम्मको कुल ऋण सेवा खर्च दुई दशमलव ९९ प्रतिशत बराबर हो